ساقی قضا و قدر منه
ویردی بو گجه بیر سبو باجی
بیر ایچیم سو ایچدیم آلیشدی دل
ووردی قلبیمه اود سبو باجی
درد و غصّه دن غنچه تک باجی
پرده پرده قان باغلاموشدی دل
اوز نجاتینه آختاروردی بو
رنج و محنت دهریدن دلیل
من ایچنده بو کوزه نین سویون
یتدی گوئیا بانگ الرّحیل
یعنی دلده درد نهانیوه
راه چاره دور بو سبو باجی
پیک مرگ اویاتدی آنام باجی
اضطرابیله خوابیدن منی
دور اجل گلوب ایلسون جدا
قوم و خویش و احبابیدن منی
ایله شدّت زهر کین سالوب
صبر و طاقت و تابیدن منی
قادرم نه رفتاره، دلده نه
واردی طاقت گفتگو باجی
یاتما نازیله زینبیم اویان
یوز ویروب سنه تازه بیر محن
باشون اوسته گور نه فغانیله
شیون ایلوری قارداشون حسن
نصف شبدور اهل حرم یاتوب
یوخدی بیر نفر حالیمی بولن
دور ایاقه ای یار و یاوریم
راه چاره قیل جستجو باجی
یاتما دور علاج ایله، قارداشون
آز قالور که تسلیم جان ایده
دور یاخوندی جدّیم رسول حق
ماتمیمده داد و فغان ایده
آز قالور آنام فاطمه یوزه
گوزیاشین غمیمده روان ایده
خون جگر گله باشیم اوستونه
قدسیان دیه طَرِّقوا باجی
یوخ علاجی بو دردیمون، فقط
مرگدور آنام باجی چاره سی
آز قالور غروب ایلیه منیم
آسمان عمریم ستاره سی
ایله آتش سوزناک اولوب
قلبیمه بو زهرین شراره سی
پیکریم سراسر دوتوبدور اود
جانیم اودلانور موبمو باجی
ویر خبر گله جان ویرن زمان
یانیمه منیم نور نیِّرِین
یعنی آغلادان ماسِوّاللَّهی
کربلاده عطشان اُلن حسین
سویله آز قالور مجتبی ئوله
دورما تیز گل ای شاه مشرقین
بیر بیریمیزی ایلیاخ وداع
دلده قالماسون آرزو باجی
قالمور اول قدر گوزیاشین توکوب
فاطمه آنام یاسیمه گله
ویر خبر بنی هاشمه تمام
دی خصوصاً عبّاسیمه گله
باشیم اوسته قرآن تلاوتی
ایتماقا سوله قاسمیم گله
آز قالور شرار فراقیمه
اودلانا چون اول ماهرو باجی
یادگار زهرا آچوب گوزین
اضطرابیله خوابیدن دوروب
گوردی قارداشی شمس برج دین
قالمور اول قدر ایلسون غروب
بولمورم نجه قارداشیم گوروب
طاقتی گیدوب باشینه ووروب
باشینه ایکی یول ووروب، ایکی
قارداشین فراقینده بو باجی
بیر مدینه ده قارداشی حسن
باشی اوسته زینب آچوب باشین
بیرده کربلاده حسینینون
حالینه باخوب توکدی گوزیاشین
گوردی یرده بی غسل و بی کفن
مهربان باجی نازلی قارداشین
زلفین آچدی توکدی کفن کیمی
ایتدی اشکیله شستشو باجی
وحی منزلینده دیوب خدا
صابرین بیوک بیر مقامی وار
صبر ایدوب اودور دخت مرتضی
ویردی ظاهره هر دوامی وار
چوخ دگوب یارا اوستونه یارا
دلده فکرت التیامی وار
سوزنِ مداوا ایدوب مژه
گوزیاشیله ایتدی رفو باجی
- چهارشنبه
- 1
- آبان
- 1398
- ساعت
- 15:25
- نوشته شده توسط
- ابوالفضل عابدی پور
ارسال دیدگاه