شرار عشقووه گر، یانماسام قرار اولماز
بهشتی وعده وئرور، بئیله بیر شرار اولماز
.
دوزولسه کیپریگوین نظمی تک بوتون اوخلار
گوزوم سپر قیلارام بیر اوخون کنار اولماز
.
او گوزلرین قاداسین من آلیم شرابین وئر
دگرلی ساغریووه من کیمی خمار اولماز
.
دولاندیر ئوز باشووا وئر منه تصدق تک
او تار زلفووی کی، لیل اونا نهار اولماز
.
او زلفیدور که منی ساخلیوب بو درگهده
کیم اوندا دامه دوشوب روزگاری تار اولماز
.
خزانه دوندی یازیم آغلادیم گجه گوندوز
یازین بولودلاریدا من تک اشکبار اولماز
.
بو جان سنونکیدی گل ، بیر یول امتحان ایله
سن ایسته سون گوزلیم جاندا اختیار اولماز
.
بو درد عشقه گولوم چاره هئچ طبیب ائتمز
که مین طبیب اولا گر دردیم آشکار اولماز
.
منیم کیمین چوخ اولار درگهونده دلداده
بو عالم ایچره ولی سنکیمی نگار اولماز
.
ظهور ائله گولوم عالملری گولوستان ائت
سن اولماسان گوزلیم قیش دونوب بهار اولماز
.