اولیدی بلبل جان کاش همیشه آزاده
توکولمییدی بنای قفس بو دنیاده
.
جهاندا کاش نه زندان اولیدی نه زنجیر
نه زهر اولیدی نه قمچی؛ نه نیزه نه شمشیر
.
نه سند شاهک اولیدی نه بی حیا هارون
نه ده اولیدی عزیز دل نبی دلخون
.
قالیدی موسی جعفر مدینه شهرینده
اولیدی آل پیمبر همیشه ایمنده
.
جانی چیخاندا اولیدی یانیندا قیزلاری
اولاندا زهر اثریندن جمالی گلناری
.
چیخیدی کاش ئوز ایاقیله بیرجه زنداندان
چکیدی بیر نفس اول تنگنای هجراندان
.
گوزینه گون که دوشنده اؤویشدیریدی گوزین
ییغیدی شیعه لرین باشینه دییدی سوزین
.
ئوزی چیخیدی گرک؛ نعشی چیخدی زنداندان
قره غلام لر اتدی اونی مزاره روان
.
همیشه مسکنی بیر چاله ی سیاه اولدی
او کس که گورمدی دنیاده گون بو شاه اولدی
.
غذاسی خون دل اولدی انیسی زندانبان
او قدری قالدی او محبسده دؤیدی دای جاندان
.
او شاهی دام بلاده همیشه ساخلادیلار
گل وجودینی گلچین لر ایاخلادیلار
.
دئمدیلر یاراسین اوردا باغلیان اولماز
ئولر گئدر؛ باشینون اوسته آغلیان اولماز
.
کیم آغلاسین؟ قیزی یوخدور که نوحه خوان اولسون
کیم آغلاسین؟ باجیسی یوخدی زلفینی یؤلسون
.
یوخیدی اهل وعیالی که دوره سین آلسین
باجیسی قاتلی یانینده باشینه چالسین
.
ئوزینی باغلادیلار گر اسیرلر مثلی
حرمی نظمیله باغلانمادی طنابه ولی
.
او سند ظالم هارا مین نفر سپاه هارا
سیاه چاله هارا قانلی قتلگاه هارا
.
اؤروجین حضرت کاظم آچاردی گوزده یاشی
ولی حسین اؤروجیدی سوسوز کسیلدی باشی
.
ئوزیده جدینه نوحه دیردی آغلاردی
همیشه گوشه ی زنداندا روضه ساخلادی
.
.
- پنج شنبه
- 29
- اسفند
- 1398
- ساعت
- 14:14
- نوشته شده توسط
- ابوالفضل عابدی پور
- شاعر:
-
مهدی فعال
ارسال دیدگاه