نَنَه زهرا یتیش امداده تِز گَل
یولی سال مَحبسِ بغداده تِز گَل
خبر وئر مرتضی جَدّیمده گَلسون
دِئنن یا مرتضی فریاده تِز گَل
منیم احوالیمه زنجیریم آغلار
غَلافینده قالان شمشیریم آغلار
اَریتدی جسمیمی زندان هارون
باخار زنجیریمه تَصویریم آغلار
وَطندن کوکب بَختیم آزوبدی
منه تقدیر اَلی غُربت یازوبدی
حسینه کربلانی ائتدی قسمت
منیمده قبریمی بوردا قازوبدی
رضاجان گوزلریم گَل باغلا اوغلوم
آدامسیز حالینه دِل داغلا اوغلوم
یتیش بالینیمه من جان وئرنده
منیله یوز یوزه قوی آغلا اوغلوم
فَراقین دردینی دوزمَز بو داغلار
اَمان بو آیریلیقدان قلبی داغلار
قزیم معصومه یول گوزلَر وطنده
اونون احوالینه اولدوزلار آغلار
دِیَر رحم ائت منه ای ذو الجَلالیم
سینَمده حَبس اولوبدی قیل وقالیم
قرار اَلدن گئدور هَرگون باتاندا
گِنه آخشام گَلور آرتور مَلالیم
- یکشنبه
- 13
- تیر
- 1400
- ساعت
- 21:56
- نوشته شده توسط
- یوسف اکبری
- شاعر:
-
حاج نادر بابایی
ارسال دیدگاه