سبک: ای شاه مظلومان حسین ... آی قارداشیم آی قارداشیم ...
.
هدایتی تبریزی
.
زنداندا سولدوم ای خدا
سن راضی سن من راضیم
غم چکماقا من بینوا
سن راضی سن من راضیم
.
.
اهل ولایه سرورم
ظلمیله تحقیر اولموشام
چوخ چوخ اذیّت چکمیشم
بو سجن ده پیر اولموشام
جان هر ندن شیرین اولار
من جان دن سیر اولموشام
ائتسین اذیّت اشقیا
سن راضی سن من راضیم
.
.
یوخدور انیس و همدمیم
زنجیر اولوب همدم منه
زندان فشاری ، غربتیم
تأثیر ایدیر کم کم منه
احوالمی بیلسه اگر
آغلار حرا ، زمزم منه
اولدوم اسیر ابتلا
سن راضی سن من راضیم
.
.
من نورم اما ظلمتِ
زندان ظلمت مسکنیم
پاک و مبرّا رجسدن
آلوده اولماز دامنیم
سلم و رضاده کاملم
لا حکمووه یوخدور منیم
عشقنده اولدوم جانفدا
سن راضی سن من راضیم
.
.
نالم اوجالسین وار یری
زنداندا چرخ اطلسه
بیر کیمسه یوخدور سس ویره
بو گوشه ده من بیکسه
شِکوه ایدنده ظلم دن
منله گلر زندان سسه
جسمیم ایدر نی تک نوا
سن راضی سن من راضیم
.
.
بیلمم نجه تحریر ایدیب
دست قضا تقدیریمی
من بی گنه زندانیم
یوخدور دئین تقصیریمی
آچمور ستمگر دشمنیم
بو کنده و زنجیریمی
واردور توپوقلاردا یارا
سن راضی سن من راضیم
.
.
زهر جفا اکبادیمی
یاندردی ، اولدوم منقلب
سند ستمگر ظلموله
بو حالمه اولدی سبب
سینمده قالدی اللریم
من یاندیم او ایتدی طرب
یاندیم او گولدی هکذا
سن راضی سن من راضیم
.
.
رنگیم سولوب جان اوستیم
آغلار گوزوم یار آختارور
خونین دل و افسردیم
گویلوم هوادار آختارور
بیر مهربان دل داغلیان
بو چشم خونبار آختارور
یوخدور یانمدا آشنا
سن راضی سن من راضیم
.
.
یوخدور توانا دورماقا
زهر ایلیوب دلخون منی
یاندی ئورک یاندی جگر
الله یانیری دشمنی
اوغلوم قزیم بوردا دگل
عرشه اوجالسین شیونی
کیمدور منه دوتسون عزا
سن راضی سن من راضیم
.
.
سنّیم جواندی محنت و
درد و بلا پیر ایلیوب
زنداندا ظلمون پنجه سی
زار و زمین گیر ایلیوب
یاره ، ایاقی گردنی
کندیله زنجیر ایلیوب
اولموش گونوم لیل دجا
سن راضی سن من راضیم
.
.
مظلوم دهرم یوخ منی
بو کنج غمده شاد ایدن
ظالم گرفتار ایلیوب
بیر کیمسه یوخ امداد ایدن
نه وار گلن نه وار گیدن
اولماز غریبی یاد ایدن
زندان اولا دارالبکا
سن راضی سن من راضیم
.
.
محبوس جورم نصف شب
بیر ماه تابان گورمورم
مهر منیرم گوندوزی
مهر فروزان گورمورم
بیر تیره زندان دور یریم
شمع شبستان گورمورم
چاتماز منه تازه هوا
سن راضی سن من راضیم
.
- شنبه
- 2
- فروردین
- 1399
- ساعت
- 21:38
- نوشته شده توسط
- ابوالفضل عابدی پور
- شاعر:
-
محمد هدایتی
ارسال دیدگاه