زینبم من یوخ توانیم ، باغ امیدیم سولوب
اربعینوندور حسین جان ، ابر احساسیم دولوب
قبریوه بیر دسته یورقون یاسمن زوّار اولوب
سالمیشام منده بو قبرین اوسته قانلی جامه وی
گوز یاشیملان تا یازام قارداش زیارتنامه وی
اَلسَّلام ای ذبح اعظم ای شهید بی کفن
اَلسَّلام ای لبلری آب فراته ناز ائدن
اَلسَّلام ای قتلگاهه هم سوسوز هم آج گیدن
اَلسَّلام ای عمرینه پایان جاویدان وئرن
اَلسَّلام ای گونلرین آلتیندا عریان جان وئرن
اَلسَّلام ای مغرب گودالیده آی تک باتان
اَلسَّلام ای نازدانه قیزلارین گوزدن آتان
اَلسَّلام ای قانلی باشی کوللر اوستونده یاتان
اَلسَّلام ای دفترعرفانی نوریلن یازان
اَلسَّلام ای ئوز الیلن اصغرین قبرین قازان
دور منه سس وئر سلامیم قویما قالسون بی جواب
قالمیوب اهل و عیالونده حسین جان صبر و تاب
آند اولا زهرایه قارداش آز قالور ئولسون رباب
معجرین باشدان آچوب ، گوزدن توکور اشک ترین
قبریوون اوسته دوشوبدور ، سندن ایستور اصغرین
یول یوروبدور کاروانی یورقونوق یوخ تابیمیز
آسمان غمده مدّتدور باتوب مهتابیمیز
گلمیشوک دیداریوه آی بی کفن اربابیمیز
معرفت بازارینون بیز نابغه تجُّاریوک
دور ئوزون خوشگلدون ائله اربعین زُوّاریوک
میهمانوق بیز سنه مهمان نواز اول ائتمه ناز
آلمیشوق عشق عالمینده گوز یاشیلان دستماز
دور اذان وئر تا قیلاق با هم ایکی رکعت نماز
گوگلوم ایستور عشقیمی دنیایه اثبات ایلیم
باشوین قانی آخان یرده مناجات ایلیم
من بورا گلدیم بو گون تا سنله دیدار ایلیم
عشق دیوانین آچام ، بیر یولدا گفتار ایلیم
ئوز قیامیمدن سنی قارداش خبردار ایلیم
شکر اولا پروردگاره رو سفید اولدوم حسین
عامل سرکوبیِ آل یزید اولدوم حسین
پرچم قرآنی قالخیزدیم گویه سقّا کیمین
ذلّته باش اگمدیم حوّا کیمین ، سارا کیمین
ئوز امامیمدن دفاع ائتدیم ننم زهرا کیمین
سسلدیم حقدور حسین ، عشقین باشیمدان آتمارام
من اونون تک بیر توکون هفت آسمانه ساتمارام
دوزدی ظاهرده گئدوب الدن جلال و منصبی
علقم اوستونده یاتوب عباس تک هم مکتبی
سیزلری خوار ائتمگه امّا هله وار زینبی
مکر و تهدیدیله سینماز زینبین شخصیتی
وار منیم چادر شبیمده ذوالفقارین قدرتی
الغرض قارداش او گون من عشقی تفسیر ایلدیم
نطق آتشباریمی برّنده شمشیر ایلدیم
من یزیدی کاخ خضراسینده تحقیر ایلدیم
ثابت ائتدیم عالمه ئوز عهدیم اوسته صادقم
تک باجی یوخ ، اللی دورت ایلدور حسینه عاشقم
ایندی امّا خسته یم ، صبرین لباسین سویموشام
عمریمی سودای عشقونده ضمانت قویموشام
آند اولا ئوز جانیوه دای زندگیدن دویموشام
یوخ توانیم ، قاره بختیم تک باشیمدا قاره وار
گویلرین اولدوزلاریندان چوخ قولومدا یاره وار
آی یاریمدور در بدر دور یثربون آهولری
شانیه حسرت قالوبدور شانه سیز گیسولری
صعب نیزه یلن سینوب بعضی لرین پهلولری
چوخ سوزی من آچمورام ، چون محنت عظماسی وار
زینبون بو کارواندا گور نچه زهراسی وار
انقلابیم ووردی قارداش سینۀ اشراره اوخ
سن منه سس وئرمَسوندَه ، وئرمه ، نینَک عیبی یوخ
تکجه بیر خواهش واریم سندن ، ثوابی چوخدی چوخ
گر چه زحمتدور ولی سعی ائله اجرا ائت حسین
بیر گجه امکانون اولسا شهر شامه گئت حسین
اوردا چون ایستکلی بیر قیز واردی چوخ ایستر سنی
او منه خردا باجیدی ، قویدی امّا تک منی
قبرینی قازدیم اوزوم ، ویرانه اولدی مدفنی
گورمَدی خوش گون جهاندا ، گِتدی جاه و منصبی
الله عالمدی اونون دردی قوجاتدی زینبی
هی دئیردی هاردا بس قالدی منیم مظلوم بابام
دای داریخدیم عمه جان ، یوردی منی بو شهر شام
اینجیدیم یول گوزلمکدن ، کاش اولا عمروم تمام
آغلورام از بس کی من ، قانه دونوب گوز یاشلاریم
نه بابامدان بیر خبر وار ، نه گلور قارداشلاریم
- شنبه
- 10
- آبان
- 1399
- ساعت
- 23:22
- نوشته شده توسط
- یوسف اکبری
- شاعر:
-
بهزاد قاسمی اردبیلی
ارسال دیدگاه