بیر باش گوتور مزاریدن ایله نظر من خواهره
گلدیم سپم گوز یاشیمی قارداش بو قبر اطهره

قامت خمیده گلموشم قرخ گوندی غرق محنتم
زایر اولام بو قبریوه بیر اربعیندی حسرتم
دور منله بیر دانش حسین محتاج بیر هم صحبتم
دور گور نجه قوجالموشام صدمه یتوب صنوبره


پائین پاده خیمه سین برپا ایدوب لیلی اوزی
قرخ گوندی ایوای اکبریم ایوای حسینمدی سوزی
آماده دی قیلسون نماز اشکین اَلور امّا گوزی
امر ایله ویرسون تا اذان اوغلون علی اکبره


هایاندا دفن اولوب دِئنَه ایکی قولی قلم اولان
سکینیه سئوال اولوب باجوندی گل کیمی سولان
گورنموری مزارینی غَمام تک غمه دولان
دیور گیداخ سلام ایداخ عَلَم دوتانِ لشکره


گلور قولاقیمه گینه آنام بو یرده وای دیور
الی باشیندا آغلوری ایوای بالام ایوای دیور
گویا مزارون اوسته دی گل غنچه وه لایلای دیور
دور ایلیاق باهم حسین عرض ارادت مادره


شهید کربلا حسین ذبیح من قفا حسین
ویروبدی حکمونی منه سجّاد با وفا حسین
نبش ایلییم مزاریوی ایدم گینه نوا حسین
وصل ایلییم گل باشیوی مزاریده گل پیکره


گلمز حسین بو فکریمه غم جامه سین تندن سویام
بو قانلی گوداله گرک دوباره دن قدم قویام
گورم یارالی جسمیوی تیر غمه اورک اویام
گر ایستسم دوداقیمی قویام او قانلی حنجره


قربانی دشت بلا نفس سلیم بو تراب
دلشوره وار بو نبشیده واردی حضوری چون رباب
گورسه یارالی سینه ده آلموش سُهاسین آفتاب
پُرسوزیله لایلای دیسون اول شیرخواره اصغره


باب الحوائج اصغرون ربابوون مارالیدی
مدینه ده گوزون آچوب بولنموری هارلیدی
سنله یاتوب مزاریده یارالی کربلالیدی
قونداقنی آلار اله آنام گلنده محشره


سایه نشینی ترک ایدوب گون ایولی روزگاری وار
گورنده هرآنا گلور قوجاقدا شیرخواری وار
سسلور بالام لایلای علی دلینده غم شراری وار
دورشهریارعشق ایله حرمت وفالی همسره


شأن و جلالتون حسین دهریده جاودانه دی
بو گلشن محمدی همیشه پر جوانه دی
ذکر مصیبتون سنون (عدلیه) خوش ترانه دی
بیر اربعین زایر اولا ایستور بو قبر اطهره