قویما توپراقا جمالون نازلی سُوگلیم رقیه
گل قوجاقیمه او زلفون توپراقین سیلیم رقیه
ائتمه غم اگر الوندن گئتدی عزّت و اساسون
آه چکمه غصه‌لنمه کهنه‌دور قزیم لباسون
جانیمی آلوبدی باالله ناز و عجز و التماسون
بو خرابه‌ده بوکولدی غصه‌دن بئلیم رقیه
شاهزاده‌سن سوزوم یوخ مسکنون دگول خرابه
گلموری گمانیم امّا فرشه تخت و رختخوابه
آلِ بوتراب عیالی یوز قویا گرک ترابه
نیلیوم گئدوب جلالیم بوش قالوب الیم رقیه
چیخما کوچیه گورورسن قزلار ایلوری اذیّت
گه لباسیوه گولوللر ایلیورله گه شماتت
داش آتور سنه اوشاقلار بیر کس ایلمور حمایت
بیز بو شهریده غریبوک قالمیوب ائلیم رقیه
صبر ائله قزیم قئیتسون قارداشون آتان سفردن
اکبریم گلوب قوتارسون جانیوی خرابه‌لردن
زینبین یارالی قلبی اود دوتار بو غصّه لردن
شوریله یّتر تمامه آی گونوم ایلیم رقیه
قلبیمه بو شامون اهلی غم قویوب قزیم غم اوسته
قویما گل یوزون ترابه قوی یارالی سینه‌م اوسته
دور گتور قبار ایاقون قوی بو یاشلی دیده‌م اوسته
سن امانتِ حسین‌سن ای شیرین دیلیم رقیه
آز دیلونده اصغر آدین ازبر ایله گَل فغانه
گورموسن آنان ربابین گوز یاشی دونوبدی قانه
غصه‌دن دولوبدی قلبی آختارور قزیم بهانه
صبر ائله غم و بلایه ای سولان گلیم رقیه
سن قزیم، یزید شومین اهلبیتینه قاریشما
گر قیزی نوازش ائتسه آلسا گوگلوی باریشما
سن او کافرین قزیلان گفتگو ائدوب دانیشما
گئتمه یانینه گلنده تا اوزوم گلیم رقیه
آلتی آیدی کربلادن گورمیوبدی شانه زلفون
قتلگاهدن تِلینده ساخلیوب نشانه زلفون
گل ئوپوب سولان جمالون وئر اویان بویانه زلفون
ای سپهر معرفتده بدر کاملیم رقیه
گوزیاشون یاخار یزیدین عاقبت بو خانمانین
یاندیرار شرار آهون بو صفالی دودمانین
بیر گونی الیندن آلّام شامی من بو بی حیانین
ایلرم سنه قباله خسته بلبلیم رقیه
بش گونون قوناقیوخ بیز سن همیشه‌لیک قالارسان
شامدن چوخ عزّتیله سن بیزی یولا سالارسان
بو گروه بی حیادن یاخشی انتقام آلارسان
مرحبا دئیر گورنلر شاد اولار دیلیم رقیه
گرچه عمریوی گئچیتدون درد و محنت و غمیله
مونس اولدون آه و ناله اشک چشم پُر نَمیله
شامی ایله‌سن تَصرّف سبز رنگ پرچمیله
ای منیم بو ظلمت ائوده شمع محفلیم رقیه
من «کریمی‌ام»ازلدن خادمم بو دودمانه
باشیمی وفالی ایت تک قویموشام بو آستانه
ایندی ائتمیشم الیمده من بو نوحه‌نی بهانه
سن اوزون توجه ایله واردی مشگلیم رقیه
- یکشنبه
- 11
- آبان
- 1399
- ساعت
- 16:32
- نوشته شده توسط
- یوسف اکبری
ارسال دیدگاه