محبت عالمینه اولسا انتها ننه دی
بو فانی زندگیه زینت وصفا ننه دی
مریض عاطفیه شربت شفا ننه دی
طبیب عشقیدی درد اهلینه دوا ننه دی
ننه دی صودامره شیر گوارانی وئرن
ننه دی قیز اوغولا درس مسلمانی وئرن
ننه دی جامعیه ناخلف انسانی وئرن
یعنی اولادیله هریرده هم آوا ننه دی
ننه وار زنده گیده چوخ گوزل انسان بجه ریر
ننه وار زندگیده دشمن قرآن بجه ریر
ننه وار هاجر اولوب بیر قوزی قربان بجه ریر
یاخشی پیس زندگیده میر و مقتدا ننه دی
بی لیاقت ننه دن خولی وشمر حاصل اولار
جاهل اولسا آنا حتما بالادا جاهل اولار
دین وقرآن وخداوندیدن هم غافل اولار
بجه رن قاتل وپیغمبری تنها ننه دی
ننه دن درس آلار اولادی بونون شبهه سی یوخ
ننه نین نسگلینه اولمالیدور نسگلی چوخ
قان دولان گوزلری گورسه گوزینه سانجلار اوخ
آقام عباسی ایدن عالمه مولا ننه دی
چون گلین گلدیکی گون تاپدی بویوگ ارج ومقام
اویانان درگهی اوپدی خانیما وئردی سلام
دئدی گلدیم بو ائوه دورت بالیا کلفت اولام
من کنیزم بولارا حضرت زهرا ننه دی
بالاسی باب الحوائج دی اوزی باب نجات
معرفتلن وئریب عباسه خانم درس حیات
حضرت ام بنین روحینه غرا صلوات
چون ابالفضل آقاما دنیادا والا ننه دی
- یکشنبه
- 11
- آبان
- 1399
- ساعت
- 17:39
- نوشته شده توسط
- یوسف اکبری
- شاعر:
-
استاد محمد ندایی مشهدلو
ارسال دیدگاه