بوندانصورا حیات اولاجاق، چوخ چتین منه
سیزده خطاب ایتمییون اُم البَنین منه
اوغلانلاریم گیدیبدی اَلیمدن عَزالییَم
یاخجی بودور کی سسلیه سیز بی بَنین منه
بیر بیر دیوبدی زینب اوزی درد و غملرین
مَردانه جنگ ایدیبدوله، اولدی یقین منه
عبّاسیمون یخلماقی امّا آغیر گلور
شرح ایلیینده زینب اونون غیرتین منه
نَقل ایلییور فراته یتوب، ایچمدی سودان
سویلوب فراته، سو گلوری چوخ سَرین منه
امّا حسینیم ایچمه سه، سَندن من ایچمَرم
اوندان قاباق ، حَرامیدی ماءِ مَعین منه
(آب گوارا و روان)
اولسون حَلال اَمدیقی صود، مشکی دولدوروب
سَسلردی تشنه دی بالالار یول ویرین منه
بیر نانَجیب صاق قولونی ایلدی قَلَم
تبدیل ایدوب خَزانه، صفا گلشَنین منه
بازوسینه آلوب عَلَمین، سَسلدی عَلَم
مَخیَمده انتظاریدی چوخ، قیز، گَلین منه
صبر ایله سن یخیلما، حسینیم منه باخیر
سنگینیدور آت اوسته، سنون لنگرین منه
میداندا سن اَسَنده اوشاقلار غَم ایلَمز
مشکی ویریب دیوب بالالار سوزلرین منه
بیر اَللی حمله ایتدی داغیتدی صفی تمام
سویلوب یازیبلا حامیِ دینِ مُبین منه
زینب دیور صول اَللی یخییب نچّه کافری
سَسلردی خیمه لر یولونی آز کَسین منه
لب تشنه قیزلاریندان حسینین حَیا ایدون
اوخ ویرمیون سو مشکیمه، تز تز آتین منه
افسوس اولا قوشون سوزونی ایتمدی قبول
زینب دییَنده آغلادی بو غملَرین منه
گویا دوشوب صول اَلده اودم توپراق اوستونه
گلسین بلاسی کاش او ایکی اللرین منه
بیر اوخ گلوب هواده دگوب مشکه، سوآخیب
حسرت باخیب دیدی باری سن اُول مُعین منه
آخسا سویون یره، حَرَمه من گیدنمَرَم
جان اوسته گورسَدیب آناسی اصغرین منه
مشکین سویی آخاندا، حَیاتیندان اَل اوزوب
زینب دیمور یخیلماقینون حالَتین منه
بیر اوخ گلیب عوض ایلدی سَرنوشتینی
هیچ کیم وَلیک شرح ایلمور هامّیسین منه
ئولدورمییب یارالار اونی شَرمی ئولدوروب
اوراق ایدوبدی دستِ خَزان، پیکَرین منه
عبّاس تک، اوغولدان اَل اوزدوم غَمه باخون
زینب گتوردی، تُحفه فقط، پَرچَمین منه
جان اوستییَم، اولوبدی سوزوم هارداسان اوغول
من آغلادیم سیزه، ئولورَم آغلیین منه
(بیکَس) خیالی وار، گینه گَلسین حضوریوه
گوزدن نثار ایدَر اودی اَشکِ تَرین منه
- یکشنبه
- 1
- فروردین
- 1400
- ساعت
- 14:49
- نوشته شده توسط
- یوسف اکبری
- شاعر:
-
مهدی عبادی(بیکس)
ارسال دیدگاه