تمام چاره یولی باغلانوب منیم یوزیمه

سنی امید بو گون بولموشم ولی اوزومه

اگر چه معصیتیم قویموب آبرو ، منده

دخیل دوشموشم اما بیر آبرومنده

که تا سالام اوزومی کلب تک نمک زاره

اولام دخیل همین وقعه ده علمداره

حسینه ویرسه قسم ، هر کس اول هنرمنده

حسینه آند اولا قویماز او شخصی شرمنده

حسینه عُلقهء مخصوصی وار او سردارون

محبتنده یازیلّار رشید علمدارون

که بیر گون آلِ علی ، اُناث و ذکور

تماما" ایتمیشدی ایوده درکِ فیض و حضور

اوشاق بویوک هامی شیرِ خدا حضورینده

او گون واریدی شهِ لافتی حضورینده

او گونلریدی ابوالفضل او پورِ شاهِ اُمم

که تازه قویموشدی عرصهء وجوده قدم

آناسی فاطمه امّ البنین قوجاقنده

او گون واریدی همان غنچه ، گل بوداقنده

باخاردی بیر به بیر اولادینه علیّ ولی

ایدوب مشاهده بو حالی شیرِ لم یزلی

گوروبدی اوغلی ابوالفضلی پادشاهِ نجف

آچوبدی قولّارینی میل ایدور حسینه طرف

هامی ایو اهلینی مشغول ایلیوب اوزینه

تیکوب ایکی گوزینی قارداشی حسین یوزینه

بَلَکدن آز قالوری اوز اوزین یره سالسون

حسین بوینونا سالسون قولینی ، کام آلسون

طفولیّتدن ایدردی بو مقصدی تعقیب

اولیدی قول بویون اولماق او با وفایه نصیب

بیله خیال ایلمه دلده نسگلی قالدی

دیوم نه وقت حسین بوینونا قولون سالدی

او ساعتیکه حسینون هامی هواداری

بویاندی لاله صفت قانه یار و انصاری

گورنده قارداشی یالقوز قالوب او اشجعِ ناس

گلوب حضورِ شه دینه حضرتِ عبّاس

ازل او سرورِ لب تشنیه سلام ایلدی

ادب یولیله برابرده بیر قیام ایلدی...

امام گوردی که قارداشدان اختیار گیدوب

بو ماجرا اونی بی صبر و طاقت ایدوب...

امام گوردی داخی یوخدی اوزگه بیر چاره

گرک اجازهء میدان ویره علمداره

بویوردی سیدِ عالم او نسلِ خیر سلیل

باشارسان ایله سوسوز اهلِ بیته سو تحصیل

همینکه سالدی او شهدن اله بو فرمانی

گوتوردی مشک و لواسین او عشق قربانی

سوار اولوب آتا ، یوز قویدی رزمگاهه طرف

دوزنمه دی دولانوب باخدی خیمگاهه طرف

گوروب گلور دالونجا امامِ عرش اساس

انوبدی فورا" آتندان یره او اشجعِ ناس

ادبله عرض ایلدی ای امامِ کون و مکان

ندور جهت بو گَلشیده اولوم سنه قربان

دئدی نه چاره ایدوم ای مه بنی هاشم

منه چتیندی فراقون وفالی قارداشیم

محبّتونله دولوب بسکه استخوان و رَگیم

بو آیریلق منه مشگلدی دوزموری اورگیم

بولوردی بیرده ابوالفضلین عقدهء دلی وار

طفولیتندن اورکده بیر عمده نسگلی وار

برابرینه چاقوردی او شه علمدارین

اورک محبّتی جوش ایتدی آچدی قولّارین

گورنده بیر بئله لطفی عزیزِ بطحادن

کسیلدی صبر و توانا او تشنه سقادن

آچلدی بال و پری ، آچدی صاقنی صولنی

حمایل ایتدی حسین بوینونا ایکی قولونی

نه کربلا ، هامی آفاق شوریله دولدی

امیرِ لشگریله شاه ، قول بویون اولدی