سن ای آرامشِ قلبِ شریفِ انبیا زهرا

سن ای سرمایه ی سلم و رضای اوصیا زهرا

سن ای اسرارِ سربسته ، مزاری کیمیا زهرا

نه ایثار ایلیوبسن سن ، علی حقینده یا زهرا

مقدس روحیوه حق دن هزاران مرحبا زهرا

علی نین شأنینه نازلدی آیه آسمانلاردان

علی نین وصفینه عاجزدی دیللر گفتمانلاردان

علی مستحکم الایمان ، مبرادی گمانلاردان

علی ذاتینده یوخ بیر ذره وحشت هفت خوانلاردان

اولوبسان سنده هم کفوِ علی المرتضی زهرا

او نعمت لر که مومن پای آلیب خلاقِ یکتادن

بیری نور ولایت دی بیوک دی کُلِ دنیادن

ولای مرتضی قیمتلی دی فردوسِ اعلادن

حقیقتده بهشت ایجاد اولوب نورِ تولادن

بهشت آلدی او نوری سندن ای نورِ خدا زهرا

گر اولمیدی محمد بی ستون گویلر یارانمازدی

علی خلق اولماسیدی نورِ پیغمبر یارانمازدی

خانیم سن اولماسیدون احمد و حیدر یارانمازدی

خلاصه عالَم و مهر و مه و اختر یارانمازدی

عدم ده دفن اولاردی تا ابد روحِ بقا زهرا

هله قدوسیان حیرتده دی راز و نیازیندن

قدومینده ورم آثاری وار فَرطِ نمازیندن

اوشاقلارین عبادت اورگنوبلر سوز و سازیندن

سنه الله باخوب حَظ ایلیوب عرشین فرازیندن

عبودیت سنه باغلاندی تاپدی اعتلا زهرا

خانیم یا فاطمه شرحِ کمالین بینهایت دی

ایوین سرچشمه ی بحرِ هدایت دی عنایت دی

سنون دامانِ پاکون پرورشگاه امامت دی

خانیم قدرون سنون معلوم اولان ساعت قیامت دی

او گون قورتار بیزی ای بانوی روز جزا زهرا

شهادت گونلروندی ای علی نین یار و غمخواری

مفصل هر گجه اجرا اولار رسمِ عزاداری

بیزه گیزلیندی یا زهرا مطهر قبرون آثاری

مسلم دور سنون قبرون فقط مهدی دی زواری

غریبه خلوتوز وار ای امیدِ اولیا زهرا

دییلر هر آنا ایستر ئورک دردین اوغول بولسون

و یا فرزندِ دلبندی باخاندا مادره گولسون

ولی مهدی مزار اوسته نجه گوزیاشینی سیلسون

دیور هردم آنا زهرا یارالاندین ، بالان ئولسون

سن ئولمزدین سنی ئولدوردی اشقی الاشقیا زهرا

او ظالم دن آنا قان آلمینجا دویمارام غم دن

و بیرده دویمارام یافاطمه ماه محرم دن

آنا لطف ایله سنده ماجرای نهر علقم دن_

منه نوحه اوخی عباس الینده قانلی پرچم دن

دئنن آیا نجه پرچم بلشمیشدی قانا زهرا

آنا ، امِ ابیها ، ای رسول اللهه ریحانه

سن عالِمسن که اوغلون درد و ماتمدن گلوب جانه

آنالیق عالَمی سندن سوالیم وار یانا یانه

آنا گوردون سلیمانی نجه باتدی قیزیل قانه؟

ابوالفضل ده ائله دوشموشدی میدانه آنا زهرا؟