فلک معصومیه اول گون که قم شهرین نشان وئردی

آیردی خانمانیندن مکان جاویدان وئردی

ز بس قارداش فراقینده دلی اندوهیله دولدی

سارالدی گول کیمی رنگ جمالی گون به گون سولدی

یتن گوندن همان شهره مریض بستری اولدی

بهار عمرینه بار غم اعلان خزان وئردی

گوروب غربت ولایتده اوزین غم رختخوابینده

چکوب شعله غم غربت دل بی صبر و تابینده

گلوبدور گوز یاشی موجه او دم چشم پر آبینده

عذاره اشکینی توکدی دئمه بیر آن امان وئردی

گلوب افغانه بلبل تک او بی کس دیده ده قانیاش

یوزین دوتدی خراسانه طرف عرض ایلدی قارداش

جمالون گورماقا قالدیم عجب حسرت منِ کولباش

فلک بولَّم منه آخر بو قم شهرین مکان وئردی

گوزوم یولدا قالوب قارداش رضا بو دار غربتده

یوخومدور بیر کسیم گلسون قالوب معصومه حیرتده

غریبلر ضامنی سن سن منی قویما بو حسرتده

گل ای قارداش فراقونده گوزوم رخساره قان وئردی

بو غربت اؤلکده ئولسم یوخومدور بیر کسیم قارداش

گوزیمی باغلیان نه وار منیم دادرسیم قارداش

یقیناً یتموری بولَّم سنه آخر سسیم قارداش

و یا مأمونیده آخر سنه ظلمین عیان وئردی

توکردی اشکین آغلاردی گلوب افغانه بیر مدّت

سارالدی گون به گون دردی وجودینده ائدوب شدّت

اورکده آتش هجران گوگلده محنت غربت

یوزینده اشک حسرت حالینه شرح و بیان وئردی

یاخونلاشدی او ساعت جان ویره معصومه جانانه

باسوب آغوشه قارداش نامه سینی گلدی افغانه

ایدوب قربان او دم جانین شهنشاهِ خراسانه

اورک باشیندا قارداش نامه سی جانانه جان وئردی

گتوردی گوگلومی درده منیم بو یرده بیر مطلب

مجسّم ایلدی گوزده بیر آیری محنتی یارب

حسینی ایستین کسلر دیسون وای بینوا زینب

بلالی زینبی بو غم کش دوران نشان وئردی

او دم آغوشینه باسدی حسینون کوینگین نالان

عذاره توکدی گوز یاشین بسان بارش نیسان

همان پیراهنه ائتدی او وقته جانینی قربان

اوز عشقین شاه مظلومه نشان اول مهربان وئردی

دئدیم کیمدور صبا استادون عرض ائتدی شه دوران

ولی کاتب خیابانی غلام شاه دور الان

حسین شوری اولان باشدا نه لازمدور اونا انسان

فقط عشق حسین آخر منه نطق و بیان وئردی