قم دیارینده باجون معصومه قارداش جان وئرور

ورد ایدوب قارداش آدون مهر و وفا اعلان وئرور

شوق وصلون باشدا قارداش ایلیوب ترک وطن

سندن اوتری چوللره دوشدوم من ای شاه زمن

سنسیز اولدوم حیف اولا غربتده پابند محن

عکس آماله نتیجه گردش دوران وئرور

سالدی تقدیر قضا دامه بو زار و مضطری

ایتدی بازار محبّتده بلا سوداگری

ایل قبیلمدن اوزاق غربتده اولدوم بستری

جام دل شربت یرینه کاسه کاسه قان وئرور

عالم مهر و وفاده تیر غم آماجیم

پایبند عشقیوم، لطف و عطا محتاجیم

سن بُلورسن من نجه قارداش وفالی باجیم

من کیمی کیمدور وفا اوسته اوزین قربان وئرور

شوق وصلون هجر ایوینده قویمیوب دلده دوزوم

آیریلان گوندن وصالون آختارور دائم گوزوم

نه علاقم وار سنه بیر سن بُلورسن بیر اوزوم

بو علاقه بو وفایه گوزیاشیم میزان وئرور

هیچ باجی دوزمز اگر سالسا گوزوندن قارداشی

خاصّه من تک باجی، قطع اولموب گوزومدن گوزیاشی

گَل آدون ویر ایتمیشم بلبل صفت هر سوز باشی

ایسترم قارداش سنی مهریم نه قدر امکان وئرور

چوللره دوشدوم وصاله دوندرم هجرانیوی

ایلیم قارداش زیارت عارض رخشانیوی

درک ایدم جان اوسته بیرده نغمه ی قرآنیوی

جان سپاره تازه بیر جان، نغمه ی جانان وئرور

هارداسان معصومه نین جانی اولا قربان سنه

اولما راضی اشکیم آخسون گوزلریمدن دامنه

گَل دلون قربانی جان اوسته اوخی قرآن منه

روحیمه لذّت اُلن دم نغمه ی قرآن وئرور

آخِرِ عمریمدی قارداش وار دلیمده چوخ سوزوم

نه یته بُلدوم وصاله، وار نه هجرانه دوزوم

جان ویرن ساعتده یولّاردا قالوب آغلار گوزوم

گوزلریم دولموش بولود تک بارش باران وئرور

نقش اولوب عکس جمالون دلده کی آئینه مه

دوزموشم مهر و محبّت گوهرین گنجینه مه

آلموشام آخِر نفسده نامه وی اوز سینه مه

نامه وین عطری منه جان اوسته تازه جان وئرور

فکر ایدنده حال و قال حضرت معصومه نی

ایلوری گوزده مجسّم زینب مظلومه نی

سینه ده قارداشینون قانه باتان پیراهنی

وای حسینیم وای دیور، قلبینده حسرت جان وئرور

اولدی بانی (تائبا)بیر اکبر آدلی نوحه خوان

سنده یازدون ایلدون بیر خدمت عالی بیان

سیز ویرون اوز خدمتوزده همّت عالی نشان

اجروزی حتماً جزاده خالق رحمان وئرور