قارداش دیمه غمینده معصومه جانه گلمز

دل یوخ دیم نلر واردردیم بیانه گلمز

واللهی سن گیدندن یوخدور یوخی گوزیمده

بیله محبت اولماز بلمم ندور اوزیمده

سنسیز الوم نشانی ظاهردی بو یوزیمده

پژمرده گل منیم تک بیر گلستانه گلمز

نه وار أنام یانیمدا قارداش مواظب اولسون

احوالیمی سوروشسون هر دم مراقب اولسون

بیر کیمسنه تاپولماز منله مصاحب اولسون

من تک وطن غریبی بلم جهانه گلمز

قلبیمده فرقتیندن بیر سوزش نهان وار

کشف ایتماقا بو دردی نه شرح و نه بیان وار

بو یانماقیمدا گویا باجیوا امتحان وار

قارداش باجی یانیندا عشق امتحانه گلمز

دل ویر موشم سنون تک بیر بی بدل نگاره

فکریم هامی وفادور من قویدوقوم قراره

خوشدور او عهد چکسه هر شهر هر دیاره

یانسا اگر غمونده قلبیم فغانه گلمز

نامون منه یتشجک گلدی اله مرامیم

چیخدیم وطندن أخر أرتدی منیم ملالیم

باد صبائیله گر یتسه سنه سلامیم

بل غربت ایچره قارداش اشکیم روانه گلمز

قویدون منی وطنده گیتدون عراقه قارداش

هر کاروان گلنده گیتدیم سراقه قارداش

باد صبا گتوردی عطرین دماغه قارداش

غربتده أغلارام من دردیم شماره گلمز

ال ساخلا سن (ثریا) یازما بو قدر محنت

قارداش غمینده چکدی باجی بو نوع زحمت

هر دم دیردی قارداش مشکلدی درد فرقت

گزلین قالوب اورکده لیکن زبانه گلمز