ای دُر گنجینه ی صدق و صفا یا زینبا

وی سپهر عصمته شمس الضحی یا زینبا

سن او بانوسن که تالی سن بتول اطهره

طاقت و آرام دل سن مجتبی و حیدره

فخر ایدر سنله حسین بن علی عالملره

ای اولان فخر شهید کربلا یا زینبا

سن او بانوسن که آگهسن نصوص نازله

نخله عفت سنون ذاتَونله دولموش حاصله

غرق حیرتدور مقاموندا عقول کامله

شانوه جانلار خانم اولسون فدا یا زینبا

بسکه والا و مقدسدور مبارک ساحتون

بسکه بی همتادی چون زهرای اطهر عفتون

بسکه پر معنادی معنای جلال و شوکتون

قالب الفاظَده اولماز ادا یا زینبا

شیر زهرایه وئروب بولمم نه جوهر لطف رب

پرورش ایلور حسین و مجتبی و زین اب

دورت بالاسی بیربیرندن منتخبدور منتجب

ماتدور بو باره ده عقل رسا یا زینبا

دامن زهراده گوز آچدون او گونکه عالمه

وحی اولوندی حقّدن اسمون رسول خاتمه

فخر ایدوب زهرا آنان سنله جهاندا مریمه

رتبه ده کیمدور سنه همتا اولا یا زینبا

سن مشرَف تا اولاردون روضه پیغمبره

اوچ امام ایلردی همَت غیرتیله یکسره

بنزدردی قامتون بیر خاتم انگشتره

گورمه سون نامحرم ای کنز حیا یا زینبا

چوخ جلالیله قاباقدا شاه اقلیم عرب

صاق صولوندا مجتبی ایله شهید تشنه لب

بو جلالیله مشرَف تا اولاردون نصف شب

یئر گوی اهلی سسلنردی مرحبا یا زینبا

بولمورم نولدی سنیله چرخ دون ایتدی ستیز

قدروی درک ایتمیوبدور خاطرون دوتموب عزیز

گوزلرون دامانوه هر لحظه اولدی اشک ریز

درد بی درمانه اولدون مبتلا یا زینبا

بش و یا دورت سیننده قالدون آناسیز آغلادون

گه آتا گه مجتبی دردیله سینه داغلادون

گه حسینون یاره سین کرب و بلاده باغلادون

اولمادون هیچ دهرده غمدن رها یا زینبا

یاد اولونسا هر زمان گر ماجرای کربلا

زینب آدی آیری دوشمز کربلادن مطلقا

اسم پاکوندور خانم بو مطلبه زینت فزا

ای آدی دیباجه داد و بکا یا زینبا

پایه صبرون قویوب حیرتده ایوبی خانم

آغلادار نسگللرون معناده یعقوبی خانم

سن کیمی بیر بانوی والا و محجوبی خانم

قویدی گور نه گونلره چرخ دغا یا زینبا

جوهر ذاتَون غم ایامیله ممذوجدی

رشته جان گوئیا حلاج غم محلوجدی

تار جسمون پود صبریله یقین منسوجدی

ای اولان مرات تندیس بلا یا زینبا

ای طلای عشقی بی غش چون فروغ آفتاب

بوته غملرده یاندون عشقون اولدی ناب ناب

بولمورم نولدی یاریم گونده گوچوب عهد شباب

قتلگه ایچره قوجالدون بر ملا یازینبا

سن خانم بیرجفت اوغول قارداشوا ایتدون فدا

گوز یوموب گیجدون اولاردان لیک بی چون و چرا

گلمه دون امّا دیله بو باره ده ای با وفا

ایتدون آیا ام لیلادن حیا یا زینبا

اوندا کیم قارداشون آیرلدی خانم خرگاهدن

چوخ جفالر گوری قوم کافر و گمراهدن

تا اوجالدی نغمه هل من معین اول شاهدن

جانه دویدون جسمدن گیتدی قوا یا زینبا

دوشمه سون تا قارداشون باشی اوگون الدن اله

دامن همت اودم مردانه وردون سن بله

بولمورم تلی نجه اندون یتشدون مقتله

قاتلیله همزمان یتدون اورا یا زینبا

صفحه تاریخده گورسنمیوب بیر رزم جو

رزمگهده اوز حریفیله اولان دم روبرو

خنجر عریانی دوتسون سن کیمی بی گفتگو

بو عمل باش وردی سندن مطلقا یا زینبا

بیله بوللم گر اوگون امر ایتمسیدی شاه دین

مندن ال ئوز زینبیم گیت اول باجی مخیم نشین

ال اوزیدون قارداشوندان آیرلیدون سن چتین

سن هارا قارداشدان آیرلماق هارا یا زینبا

داد او ساعتدن شهید اولدی امام غم حشم

خیمه لر یاندی ال آچدی غارته قوم ظلم

اولدولار جمله پناهنده سنه اهل حرم

دلده بانگ یا علی یا مصطفی یا زینبا

تا خیم یاندی خانم یاندون مرامه چاتمادون

لیک باشدان قیزلارین فکرین اودمده آتمادون

گرچه آختاردون ولی نچّه بالانی تاپمادون

نسگل اولدی قلبوه بو ماجرا یا زینبا

نسل زهرا بیله بوللم وارون حق حیات

دوزدی بو سوز واردی قول عقلده بی حد ثبات

ورمه سیدون سن او گون سجاده گر اوددان نجات

منقطع اولموشدی نسل مرتضی یا زینبا

بیرده آل اللهدن ایتدون حمایت شامده

قتل عام اولجاق یزیدین فکری بزم عامده

سن مدافع اولماسیدون اول چتین هنگامده

قتله باقرده یتردی ای بسا یا زینبا

چرخ سفله ایتدی یا زینب سنی چوخ دل کباب

کوفه و شاماتی گزدردی سنی قولدا طناب

منزلون گه اولدی ویرانه گهی بزم شراب

گورمه دون عمرونده خوش گون مطلقا یا زینبا

داد او گوندن کیم اولوردون داخل بازارشام

کف چالان توهین ایدن بی شرم ملت بالتمام

چخدلار پیشوازه مست و پایکوب و شادکام

آز قالوبدور قلب پاکون اود دوتا یا زینبا

سنده گویا وار ولایت ماسوالله تمام

اسکتوا حکمیله اشیانی ایدوبسن جمله رام

اعتقادمدور خانم عین یقین دور بو مرام

نافذ ذرات اولوب حکمون بسا یا زینبا

مکتب ((ذهنی))ده بیر طفلم ((فغانی)) شهرتیم

سیزلره عرض ارادت دلده عمده نیتیم

مین امیدیله سیزه ال آچموشام وار حاجتیم

سیز دئسوز حاجت اولار بی شک روا یا زینبا