چون شهیدان گیدیلر آغ خلعت عاشورا گونی
ایلروک بیزده اولاردان بیعت عاشورا گونی
اوغلی صادقدندی بو فرمایش اولما ناگران
گئت اوخی ایلوب روایت حضرت عاشورا گونی
آغلیوب قان چون حسینه کلّ خلق اولموش بو گون
شیعه گیسه حقّی وار قان خلعت عاشورا گونی
یا حسین بو آغ کفن بو خنجر عریان بو باش
کاش اولا کرب و بلا بو فرصت عاشورا گونی
اکبر و عبّاسون عشقینده ویراق خنجر باشا
قانیلن تاپسون بدنلر زینت عاشورا گونی
اولمادوق افسوس دشت کربلاده بیز او گون
تا اولا فیض شهادت قسمت عاشورا گونی
باش یاریب زهرا قیزی زینب حسینون عشقینه
مدّعی خوف ایله تاپ اهلیت عاشورا گونی
بیر خانم کی مامی زهرادور آتاسی مرتضی
اشتباه ائتمز زن با عصمت عاشورا گونی
باشه ویرماق خنجر برّانی عاشق ایستیور
اولماز هر عاشقده بیله جرئت عاشورا گونی
سینه و زنجیری نسواندا توانادور ویرا
ایستیور باش یارماقا چوخ غیرت عاشورا گونی
سنده بو جرئت اگر یوخدی دای ایراد ایلمه
باش یارانه ویرما جانا تهمت عاشورا گونی
غیر عاشورا او خنجردن بیرین ویر باشوه
اولماسا فوراً تاپارسان رحلت عاشورا گونی
چوخ گوروبلر عالم رؤیاده زهرا خط چکور
باش یارانون خنجرینه أمّت عاشورا گونی
باش یاران یعنی حسینون عاشق دیوانه سی
عاشق دیوانه بیلمز زحمت عاشورا گونی
باش ندی روحیم وجودیم یا حسین قربان سنه
سنده باش وئردون بو دینه حرمت عاشورا گونی
بعضی نادان ایلیور مولا شماتت بیزلره
قیلدون آگاهانه سنکی نهضت عاشورا گونی
هم اوزون هم یار و انصارون بویاندی قانینه
ایلمیشدوز ئولمگه سیز نیّت عاشورا گونی
قانیلن غسل شهادت ایلدوز هر تک تکوز
عترتون سایسیز چکیبدی محنت عاشورا گونی
اوزگه بیر احواله دوشدی حضرت زینب او گون
قارداشین باشسیز ائدنده رؤیت عاشورا گونی
بیلمورم آیا ال آتدی باشینه یا آتمادی
دُؤزدی بو ظلمه خانم بیر عورت عاشورا گونی
داشلارون آلتیندا ایتمیشدی حسینون پیکری
قارداشین عطری ائدیبدی طلعت عاشورا گونی
سسلدی بیر دفعه ایوای بو حسینیمدور منیم
بیر حزین سس گوردی ایلور صحبت عاشورا گونی
آللّه آللّه سسلیوب ناگاه ال آتدی باشینه
گوزیاشی آخدی تاپوبدی رقّت عاشورا گونی
بیلمدی قاچسون خیامه یا چاغیرسون دادینه
گوردی مشکل گلسه دُؤزسون عترت عاشورا گونی
یا علی سسلندی ای شاه نجف امداده گل
گور نه ظلم ایلوب حسینه بدعت عاشورا گونی
سو کنارینده سوسوز باشین کسیبدی کوفیان
ائتمدوک چون کفریله بیز بیعت عاشورا گونی
چوخ دئدی رخصت وئرون کوچ ایلیوم بو شهردن
تاپدی شدت جور و کین هر ساعت عاشورا گونی
من نجه بو حالدن ایلوم خبردار عورتی
ایلمز گورسه رقیّه م طاقت عاشورا گونی
یوخ باشی پیکرده جسمی خاکیله یکسان اولوب
عالم امکان دوتوبدی حیرت عاشورا گونی
یارمیشام منده حسین جان بعضی عاشوراده باش
لطف قیل تاپسون "صفا"ده شهرت عاشورا گونی
- دوشنبه
- 4
- مرداد
- 1400
- ساعت
- 21:6
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه