یوزون قویوب قوری توپراقه چوخ ملالیله
دیردی درد دلین بو زبانحالیله
چخوبدی عرشه فغانیم اوغول جواد ئولورم
یتوب دوداقیمه جانیم اوغول جواد ئولورم
ویروبله زهر جفا اود دوتوب یانار جگریم
واریمدی درد نهانیم اوغول جواد ئولورم
اَلیم ئورکده، یوزیم یرده، گوزلریم قاپودا
اولوبدی ورد زبانیم اوغول جواد ئولورم
ئولنده گَل یوزیمی باری قبلیه دوندَر
یوخومدی کیمسه گمانیم اوغول جواد ئولورم
ئوزوم غریب، یانیمدا باجیم عیالیم یوخ
وطن دگُل بو مکانیم اوغول جواد ئولورم
اَسوب سموم ستم سولدی گلشن عمریم
یاخونلاشوبدی خزانیم اوغول جواد ئولورم
قویوب جفائیله مامون بالالاریمی یتیم
گُل اوزلی تازه جوانیم اوغول جواد ئولورم
ودایع نبوینی گَل ایلیوم تسلیم
قالا یانوندا نشانیم اوغول جواد ئولورم
یانیمدا یوخ گوزیمی باغلیان غریبم اوغول
فراقه یوخدی توانیم اوغول جواد ئولورم
منی ایدوبدیله جدّیم حسین کیمی مظلوم
دوروب دوداقیده قانیم اوغول جواد ئولورم
دیوب بو سوزلری مظلوم امام اولوب بیتاب
گَلوب جوانی باشی اوسته ویردی بیله جواب
سرشک توکمه عذاره بابا دیمه ئولورم
جواب ویر بو فکاره بابا دیمه ئولورم
گوزیوی آچ گله آغلار گوزین فداسی اولوم
یوزیمه ایله نظاره بابا دیمه ئولورم
غم فراقیله قلبیم یانوب نه مدّتدور
بو قلبه سالما شراره بابا دیمه ئولورم
مدینه دن سسون آلدیم فغانیله گَلدیم
باخ عارضیمده غباره بابا دیمه ئولورم
یوزیوی توپراقا قویما، گوتور باشون یردن
آلوم باشیوی کناره بابا دیمه ئولورم
بو نوعیله اوره گون باشینی اوغوشدورما
غمون دور ایله شماره بابا دیمه ئولورم
آنام باجیم بیبیم آغلار، بابا یولون گوزلر
ندور عیالیوه چاره بابا دیمه ئولورم
سولوبدی گُل کیمی رنگون گورر یتیم اوغلون
فغان ایدر چو هزاره بابا دیمه ئولورم
غریب جانیوه قربان اولوم آز آغلا بابا
گوز آچ اماندی دوباره بابا دیمه ئولورم
پوزوبدی حالیمی بیحد بو پوزقون احوالون
ترحّم ایله بو زاره بابا دیمه ئولورم
دیوب باباسنا بو سوزلری امام جواد
عذاره گوزیاشی جاری ایدوب، چکوب فریاد
غریب طوس آچوب گوز گوروب جوان اوغلین
باسوبدی جان کیمی آغوشه اول زمان اوغلین
سالوبدی بوینونا قول، گَلدی مرغ دل هوسه
آتا بالا ایکیسی ویردیلر نفس نفسه
گریز به شهادت علی اکبر(ع)
ئولونجه وار یری گَلسم فغان و فریاده
الهی بو نه گوزل آرزودی دنیاده
قوجا آتا آچا گوز جان ویرن زمانینده
جوان اوغول گوره یارب دوروبدی یانینده
اورکده نسگلی قالماز گیدر غمی او زمان
باخار جوانینه جانانه جان ویرر آسان
بونون برابری مافوق بلکه نسگلدور
بو مطلب عکس اولا هر بیر آتایه مشکلدور
قوجا آتا گوره جان اوسته نوجوان اوغلین
قالار نه حاله آتا گورسه اول زمان اوغلین
حسین نه حاله قالوب بُلمورم، خدا بُلوری
گورنده جدّی شبیهی جوان اوغول اُلوری
او حالی هر گوره نین اختیارینی آلوری
قلجلانوب باشی، قان ایچره اَل اَیاق چالوری
بدنده یاره لری چشمه چشمه قان ویروری
نفس باتوب، گوز آخوب، توپراق اوسته جان ویروری
ایکی اَلیله گوتوردی امام دل خسته
آلوبدی پارچالانان باشینی دیزی اوسته
سیلوبدی گوزلرینون قانینی اولوبدی ملول
بویوردی آچ گوزون ای جدّیمون شبیهی اوغول
سحر ستاره سی تک تیز غروبه یتدون اوغول
قویوب غریب آتاوی تک بو چولده گیتدون اوغول
شل اولسون اَلری کیم ووردی باشیوه شمشیر
بو یاره نون ایدوری سوزی قلبیمه تاثیر
گُل اوزلی تازه جوانیم آنان گوزیندن ایراق
ایدوبله پیکریوی برگ گُل کیمی اوراق
نه قَدر سسلدی دیندوردی سیّد الشّهداء
جواب گَلمدی، بیر صیحه چکدی وا وَلَدا
اوغول باشینی گوتوردی باسوب اورک باشنا
سووومادی اورگی، شدّت اولدی گوز یاشنا
باشین قویوب یره اشکیله دولدورب گوزینی
اوغول جنازه سی اوسته سالوب او شه اوزینی
یوزین قویوب یوزینه قان قاریشدی گوز یاشنا
دیدی اوغول اولا توپراق بو عالمین باشنا
غریب آتاندا عزیزیم نه تیز بیله دویدون
اوزون گیدوب منی دشمنلر ایچره تک قویدون
او قدری آغلادی، سس چکدی، ایلدی شیون
باخوب او حالینه اودلاندی سنگدل دشمن
گوروردولر اوغولون زخم جسمی قان ویروری
باخان او حاله دیردی حسین جان ویروری
اوغول یوزیندن ایدنده یوزین امام کنار
ایدوب نظاره نه گوردوله قوم کینه شعار
آتا محاسنین ایلوب خضاب اوغول قانی
او حالی وار یری یاندورسا کون و امکانی
بو شاهزاده (حسینی) حسینه سوگُلیدور
شبیه ختم رسل گلشن وفا گُلیدور
- یکشنبه
- 25
- آبان
- 1399
- ساعت
- 18:18
- نوشته شده توسط
- یوسف اکبری
- شاعر:
-
سعدی زمان سیدرضا حسینی
ارسال دیدگاه