بیز رضا زائرییوخ موهبته مشترییوخ
منزل نوره گلوب منزلته مشترییوخ
خبر آل هامی دئسون معرفته مشترییوخ
معرفت اولسا اگر نوریله قلبون دولاجاخ
معرفت اولماسا گلزار حیاتون صولاجاخ
بو رضانین آدی هر دردلرین چاره سیدی
ایرانی روشن ائدوب فاطمه مه پاره سیدی
بو جماعت که گورورسن اونون آواره سیدی
کیم چاتار عالم امکاندا رضا پایه سینه
هامینی جمع ائلیوب ببر علمین سایه سینه
آلماسین سایه سین الله باشیمیزدان بو شاهین
باغلامور هئچ کسه جبریل ئوپن بارگاهین
کیم دییور نوکریوم فوری باغیشلور گناهین
بیزده، انصاف دگول ترک گناه ایله میاخ؟
معصیت بسدی گلون عمری تباه ایله میاخ
خوشدی زوار رضا خُلق رضادن دانیشا
کینه نی ئولدوره قطره کیمی بحره قاریشا
بیر بیریلن کوسولی اولسادا بوردا باریشا
قلبیمیز متّحد اولسا غمیمیز زایل اولار
ایلساخ راضی رضانی برکت نازل اولار
بیز بورا گلمه میشوخ مکنت دنیا قازاناخ
آد زیارت اولا بازاریده حیران دولاناخ
گلمیشوخ مشهده غفلت یوخوسوندان اویاناخ
عُمریوین قدرینی بیل بوردا صفا درده دگر
اعتقاد اهلینه سوغات دعا درده دگر
نئچه گون بوردا قوناقسان آقاوین دوت اتگین
ئوپ گوزون اوستونه قوی سفره سینون دوز چورگین
ایستوسن دین قالا سالم بونا تاپشور اورگین
خوش اونون حالینه سرمایه خیرات آپارور
آقادان بیر شئی آلوب قبرینه سوغات آپارور
بیز بورا گلمه میشوخ گنبد و ایوانه باخاق
زرق و برق شعف افزای شبستانه باخاق
گلمیشوخ یاری تاپاخ جلوه جانانه باخاق
مدّعی فکر ائلمه شیعه طلا عاشقیدی
بو جماعت که گلوب طوسه رضا عاشقیدی
بیز بورا گلمه میشوخ قافله نی لنگ ائلیاخ
باغلیاخ یولّاری زوار یرین تنگ ائلیاخ
ایستوروخ قلبیمیزی یاریله همرنگ ائلیاخ
گلمیشوخ عرض ائداخ ای پادشه بنده نواز
آد یازاندا سنی زهرا بیزی ده دفتره یاز
بیز بورا گلمه میشوخ بیر گئجه ده سلمان اولاخ
ادّعا ایلَمیروخ نابغۀ دوران اولاخ
گلمیشوخ دامن مولانی دوتاخ انسان اولاخ
معرفت مشتریسی جان وئره افسوس ائلمز
بو آقا چوخ آقادی هئچ کسی مایوس ائلمز
- یکشنبه
- 25
- آبان
- 1399
- ساعت
- 18:22
- نوشته شده توسط
- یوسف اکبری
- شاعر:
-
ولی الله کلامی زنجانی
ارسال دیدگاه