ای صبا گئتسون بقیعه وئر خبر ام البنینه
زینب عباسه دوتوبدور اربعین، گل اربعینه
زینبی بو توزلی قبره سانما سن تنها گلوبدی
باش آچوب بو اربعینه حضرت طاها گلوبدی
هم آتام ساقی کوثر، هم آنام زهرا گلوبدی
آغلاسونلار بیر شکسته فرقه بیر اوخلی حبیبه
دور شبیه قبری اوستن ای اوغولسوز زار و خسته
وادی کرب و بلاده گل حقیقی قبری اوسته
وا ابوالفضلا دی آغلا، ای اوغولسوز دلشکسته
وور شرار آهویله آتش افلاک برینه
ناحیه مینلرجه گلسه بیر جوان مرده عزایه
ناله ده یتمزله هرگز داغ دیده بیر آنایه
اکبره لیلا، سریه قاسمه گلمیش نوایه
سنده سردار اوغلوون گل قبری اوستونده انینه
گورمیوب گورمز بو عالم خلقتندن تا قیامت
قامت عباسه بنزر بیر جوان سرو قامت
اول اوجا قامتدن ایمدی وار کیچیک بیر قبر علامت
مایه ی نسگلدی بو غم تا جهان وار عالمینه
کربلا دشتنده سالدی قان ایچینده اهل کوفه
چرخ آل هاشی دن بیر ایشیقلی آی خسوفه
چرخده اقمار طالع گر اولا بالغ الوفه
غیر ممکندور بو آی تک نور ویرسونلر زمینه
اربعینینده اولوبدور هر جوانین بیله مرسوم
قبری اوسته گل دوزه للر اقرباسی زار و مهموم
گور نجه گللر دوزوبدور قبر عباس اوسته کلثوم
اوخشوری اما بو گللر بیر سارالموش یاسمینه
هر بیری بیر عندلیب خسته دل بیر تازه گلدی
نولدی بس گللر سارالدی کیم خدادن غیر بلدی
شامده سولدی بو گللر اوندا که بیر بلبل الدی
آج، سوسوز، پربسته، خسته، ویردی جان جان آفرینه
بو سارالموش گللرین وار بیر مفصل ماجراسی
زینبون گور چوخدی حزن کوفه سی یا کربلاسی؟
ام کلثومین باتوبدور آغلاماقلیقدان صداسی
سن اوغول سسله بو قارداش، ویر صدا بو دل حزینه
کوفه ده ای کاش اولیدون تا گوریدون محشریمدور
گون کیمی نوک جداده قانلو بیر باش رهبریمدور
گورمدیم عباس باشین تا دیم سرلشکریمدور
آیری سالمشدی وزیر جنگی شهدن قوم کینه
اوندا که السیز بدنله پرچمین قویموردی یاتسون
قارداشیم بو فکریدیدی پرچم دینی اوجاتسون
منده گوردوم نیر دین آز قالور بالمره باتسون
مقصدین تعقیب قیلدیم باشلادیم تبلیغ دینه
آتشین نطقه مخاطب ایلدیم شیخیله شابی
کوفه شهرینده هویدا اولدی محشر انقلابی
من دانیشدیقجا گورنلر یاده سالدی بوترابی
ایلدیم مرهون منت دینی نطق آتشینه
ای «حسینی» دوت گل عشقین، ال گوتور خاریله خسدن
نفسه مرکوب اولما جهد ایت، سال او غداری فرسدن
متقیدن خیر عمل مقبول اولار، نه بو الهوسدن
ایسته سن الله رضاسین پیرو اول دین مبینه
- سه شنبه
- 27
- آبان
- 1399
- ساعت
- 11:56
- نوشته شده توسط
- یوسف اکبری
- شاعر:
-
سعدی زمان سیدرضا حسینی
ارسال دیدگاه