به سبک(زینبم جان اوستیم...)
گلمیشم پای پیاده یاحسین دیداروه
سن ننون زهراجانی لطف ایله بو زوّاریوه
قبریون قربانی - کربلامهمانیم
گلمیشم قبرین کنارینده دوینجا آغلیام
قتلگاهه یوز قویوب بو سینمی من داغلیام
باشیمه قاره گرکدی بو عزاده باغلیام
دردمندم باخ اوزون بو خسته دل بیماریوه
قبریون قربانی - کربلامهمانیم
اربعین زوّاریم دردیم دواسی سنده دی
عمرومون زهرا جانی ذوق و صفاسی سنده دی
بو گلن زائرلرین لطف و عطاسی سنده دی
جان فدا اولسون سنین مولا گوزل درباریوه
قبریون قربانی - کربلامهمانیم
قوؤمادون حرّی قاپوندان چیخدین استقبالینه
قول قانادی سینمشیدی چکدون ال سن بالینه
پر ویریب قوندی بهشته خوش اونون اقبالینه
قوشدون آخر حرّی سن جاندان گیچن انصاریوه
قبریون قربانی - کربلامهمانیم
گل منی حره باغیشلا گر چه عاصی بنده یم
چوخ گناهیم واردی سندن یاحسین شرمنده یم
من سنون عشقینله مولا بو جهاندا زنده یم
نا امید ایتمه منی من نوکرم سرداریوه
قبریون قربانی - کربلامهمانیم
باخسا گر عباس آقا عالملره ناز ایلرم
قوش مثالی پر ویریب گوگلرده پرواز ایلرم
قاتسا دوز اشعاریمه سو صحبتین باز ایلرم
ایلرم بو جانیمی قربان سوسوز دلداریوه
قبریون قربانی - کربلامهمانیم
ای قلم سو صحبتین سالما اورکلر قان اولار
هم رباب آغلار هم اصفر گوزلری گریان اولار
نهر علقمدن آخان سو موجلی طوفان اولار
سسلنر عباس احسن مرحبا ایثاریوه
قبریون قربانی - کربلامهمانیم
ای اولان مشکل گشای اهل عالم اللری
ناامید ایتمه امیدیله گلن زائرلری
یازدی بو اشعاری آغلار گوزلریله(ماه پری)
تا که بلبللر نوا سالسین گوزل گلزاروه
قبریون قربانی - کربلامهمانیم
- سه شنبه
- 27
- آبان
- 1399
- ساعت
- 12:25
- نوشته شده توسط
- یوسف اکبری
- شاعر:
-
رضا ماه پری زنجانی
ارسال دیدگاه