فغانه گتدون عجب ای فلک جوان ننه‌می
نه علّته ایلدون قامتی کمان ننه‌می
قاپوموزا نیه اعدا توکلدی اود وردی
بلایه سالدی اولار سیلیه نشان ننه‌می
قاپی فشاری ایله سندیروب قابورقالارین
سینه‌سی یاره لننده آپاردی قان تنه‌می
بو ایکی آی یاریمون غصّه‌سی نه چوخ چوخومیش
باشین آغارتدی قوجالتدی سیزیلدیان ننه‌می
یوخومدا گلمور اقلاً یوخی دوشوب باشیما
یاتام گورم گیجه رؤیاده مهربان ننه‌می
یوزینده سیلی‌نون آثاری گیتدی قبر ایوینه
من اوخشارام بیله پهلولری سنان ننه‌می
قابورقالاری سنان بیرقولی سنان ننه وای
چوخ اینجیدوب دیرم گردش زمان ننه‌می
قاریشدی قانه صودی ئوپدی سینه سین مسمار
یخلدی سینه سینه آلدی آستان ننه‌می
شهید ایله دیلر محسن آدلی قارداشیمی
یاراسی سینه‌ده ایتمیشدی نیمه جان ننه‌می
گیجه زمانی منیم محنتیم اضافه لنر
خیالیمه سالارام مسجده قاچان ننه‌می
حسین گئجه یاریسی گوزلرین آچار یوخودان
ایکی گوزی گورورم آختارار جوان ننه‌می
دیر منه باجی یاندیم ننم هانی سو ویره
باخار صاقا صولا گورمز غمه یانان ننه‌می
دیر منه سحر اولسون داریخمشام زینب
اورگیم ایستور ایله زار و ناتوان ننه‌می
آلاق بابامدان اجازه گیدک مزارین ئوپک
قالانمارام بیلوسن گورمسم هاچان ننه‌می
دوروب ننم عوضینده گوزل یوزون ئوپرم
دانشدیرور دیرم ایندی قدسیان ننه‌می
باشیندا قاره‌سی بیت الحزنده ایتدی فغان
او یرده قویمادیلار قالسون آغلیان ننه‌می
نه قارداشی واریدی نه آناسی نه باجیسی
زمانه یوردی عجیب قمچیلر یوران ننه‌می
جنازه سی گئجه دفن اولماقا اولوب راغب
آپاردی یدّی نفر قبره ناگران ننه‌می
- پنج شنبه
- 29
- آبان
- 1399
- ساعت
- 19:51
- نوشته شده توسط
- یوسف اکبری
- شاعر:
-
استاد یوسف معزی اردبیلی
ارسال دیدگاه