حسینون عشقی جهاندا منه کفایتدی
بو عشقی عالمه وئرمم نشان عزتدی
گوزل آدین آنام اورگتدی دیل آچان وقته
حسین حسین دئمیشم دیلده آدی عادتدی
خوشام حسین قاپوسیندا که صرف اولور عمریم
دوتوب المیندن آقا لطفی بی نهایتدی
گورنده قاره عَلَم یاحسین دئیوب اوپرم
آخار سرشگیم ئوزه یادگار نهضتدی
دوشر خیالیمه هر لحظه کربلای حسین
نه کربلا که او یئر عرش وفرشه زینتدی
اگر چه بزم عزاده مُدام آغلامیشام
هله ده دویمامیشام، دویمارام که لذتدی
حسینه آغلاسا کیم مشتری خدا اوزیدی
گلوب حدیث بُکاده جزاسی جنتدی
ولی منیم نه گوله، نه جنانه ، میلیم وار
حسینون عاشقیم گلشنیمده هیئتدی
وئرنده جان باشیم اوسته اگر آقام گلسه
بسیمدی فخر ائلرم یئر گویه سعادتدی
بو قاره کوینگیله تاپشرون منی قبره
دئیر نکیریله مُنکر حسینه نسبتدی
طریق عشقیده صدقیله کیم قدم ووردی
ایکی جهاندا یقین شامل عنایتدی
یازوبلا دفتره عاشقلرین آدین بیر بیر
ولی بیر آد گورونور فخر آل عصمتدی
لقبده اُم مصائبدی پاک ادی زینب
کتاب عمری سراسر غم ومصیبتدی
ملالی قلبیده گر بیشماریدور اما
حسینچیم دئدی من مکتبیم ولایتدی
او دور که عصرین امامی همیشه قان آغلور
دوشنده مشکله کیم بو حدیث حضرتدی
بو دور پیامی ( علیکم بعمتی) زینب
مقام و رتبه سی والادی باب حاجتدی
قلم الیمده یازا حال احتضاریندن
گلوب تلاطمه یعنی که عالی فرصتدی
نجه یازوم بو غمی یابن العسکری عفو ائت
وفات زینبه بیر مختصر اشارتدی
یوزینی کرب وبلا سمتینه خانم دوتدی
دئدی حسین باجیوام گل زمان رحلتدی
بو آخرین نفسیمده اوزیوی شامه یتور
یامان گونومدی منیم ، شهر ، شهرِ غربتدی
آدامسیزام سسیمه یوخدی سس وئرن قارداش
وئرن تسلی منه گوزده اشک حسرتدی
حلال ائله سنی گر سسلورم بونی بیلورم
یارالیسان باشا باش پیکرون جراحتدی
دئمه که عشقیوی باشدان باجون آتوب ، آتماز
بو سینم اوسته اولان کوینگون علامتدی
گلنده باشیمون اوسته سنه بیر عرضیم وار
خبر وئر اکبر وعباسه گر چه زحمتدی
بویور که شامیده غملر اسیری جان وئروی
گوزی یولوزدا قالوب انتظار وصلتدی
ئولنده خوشدی که قارداش باجینی قبره قویا
بیر اوزگه سی قویا گر روحیمه اذیتدی
غریبه کیم کفن ایلر بو دارغربتده
اوزون یتور که باجون کوی حقه دعوتدی
گتوردی چرخ زمان بیرده شهرشامه منی
اولام رقیوه همسایه بوردا قسمتدی
اسارتینده دوزنمزدی آیریلا مندن
دییردی عمه وجودیم اسیر وحشتدی
ئولونجه دوشمدی مندن کناره بیرلحظه
بویرده نازلی رقیه منیله راحتدی
باشیمدان آچمامیشام قاره وی عزادارم
بوقاره باشدا منیم مظهر ارادتدی
یتوردوم حقیوی اثباته خلقه بیلدیردیم
یزید امر خلافتده بی لیاقتدی
سنون غمون منی چولدن چوله سالوب قارداش
یازیلسا دفتره گر بیر اوزون حکایتدی
عیان اولار نظریمده مدام قتلگهون
نه قتلگاه خیالی دلیل مُحنتدی
خیامیدن اوزیمی تا چوخور یئره سالدیم
نگوردوم اوردا به پا حشریدی قیامتدی
گلنده خنجر الینده شتابیله قاتل
دیین بیر اولمادی ؟ بو شاهکار خلقتدی
باجون ئولیدی ندن ئولمدیم او اثناده
ملر قویان منی قارداش همان اوساعتدی
ایاقدا چکمه چیخوب سینون اوستونه او دنی
دئدیم دایان بو گل گلشن نبوتدی
- جمعه
- 30
- آبان
- 1399
- ساعت
- 19:12
- نوشته شده توسط
- یوسف اکبری
- شاعر:
-
حسین فتاحی
جعفر فتحی اربط