شأن بی پایان وئروب خلاق یکتا زینبه
حشره جن گلمز داخی خلقتده همتا زینبه
یتمیش ایل کعبه جوارینده نماز بی ولا
دوز قضاوت ایلسون چاتماز بیزیم یا زینبه
جوهر انساندا بیر فطرتدی بو مردانه لیک
عشقیدن الهام آلوب یانماقدادی پروانه لیک
معرفتدور درگه زینبده که دیوانه لیک
قوی دئیوم دیوانه ام من بی مهابا زینبه
زینبون آدی دیریلدوب اعتبار خلقتی
مریم و سارادن افضلدور بونون شخصیتی
گر الیمدن دوتسا زینب نیلورم من جنتی
حق گوزلّیک بذل ائدوب جنتدن اعلا زینبه
جهد ائله زینبدن آل شور ولا شوق وداد
حلقه زنجیر تک وئر ال اله تاپ اتحاد
سسله ای غیرتلی شیعه، عشق زینب زنده باد
دوز دیین عاشق ائدر جان نقدی سودا زینبه
ادعا باطلدی الده اولماسا محکم دلیل
ایلورم منده بو گون بیر ادعای بی بدیل
بوستان عشق زینبدور بو شهر اردبیل
باورون گر یوخدی باخ، گور وار نه غوغا زینبه
زین اب یعنی سپهر عشقه خورشید جلی
مست سودای حسینی تابع امر ولی
محمل اوسته آتشین گفتاری صددر صد علی
اوخشیان تاریخیده کیمدور توانا زینبه
عشق یار اولسا اگر دل بیلمین لر دیلّنر
حق مدد وئرسه قریحَم جوشلانار سوز سئلّنر
گر علی بلّنسه کیمدی شأن زینب بلّنر
یوخ یازان ئوز رتبه و شأنینده معنا زینبه
شیعه سن غیرت نشان وئر مجلسه سپ گوزیاشین
قدی خم زینب گورنده داشلیولار قارداشین
سسلدی یاندیم اباالفضل محمله چالدی باشین
مدرک غیرت اولوب زلف محنّا زینبه
گور نجه عشقونده قارداش دهره غوغا سالمشام
فکر ائدور دشمن که اولمشام تک قالمشام
بیلمیور دیوار و در دن یانماقا درس آلمشام
دوشمرم جاندان هله سن سن مسیحا زینبه
ای در احسانوون موسی بن عمران محتاجی
سایه عشقون سماوات اهلینون باشدا تاجی
سن کیمی قارداش داغیندا تاب ائدر هانسی باجی
بنذین کیمدور بلا صحنینده آیا زینبه
فاطمه داودی، شوریله اوخی قرآنووی
زینبم سیندیرمارام ئولسمده حق پیمانووی
موبه مو قول باغلی اجرا ایلرم فرمانووی
باغلیانمز راه عشقی مَکر اعدا زینبه
فرصت آسایشی قوم عناده وئرمرم
مسند توحیدی شوم و بدنهاده وئرمرم
من علینون منبرین ابن زیاده وئرمرم
فاتحم هر صحنه ده یاوردی حق تا زینبه
قویمارام غم سندیرا آرامیمی صبریم داشا
یدی قارداش پرچمین حمل ایلرم من تک باشا
سسلرم دشمن حضورینده یاشا قرآن یاشا
مرحبا احسن دییر جنتده حورا زینبه
- چهارشنبه
- 20
- مرداد
- 1400
- ساعت
- 21:18
- نوشته شده توسط
- یوسف اکبری
- شاعر:
-
سید تقی سیفی اردبیلی
ارسال دیدگاه