صبح ازل ولانی یازاندا خدا منه
هجران اودوندا یانماقی ائتدی عطا منه
من مهدیم کی سیز منی یاددان چیخاتمیسوز
عرش اهلی ایلیر ولی هرگون دعا منه
من وعدۀ ظهوریمی ازّل گون آلمیشام
عَجّل علیٰ ظُهوری دئیون مطلقا منه
عشقین صفاسی لذتی هجران اودوندادی
عشق و فراقی لوحیده یازدی قضا منه
یاددان چیخاتمیون خلف آل کوثری
کوثر نه دور تیکوبدی گوزون نُه سما منه
غربت مسیرِ سیریم اولوبدور بو عصریده
وار کیمسه خلق آرا، کی اولا آشنا منه؟
بیله بلا کی نازل اولور علّتی بو دور
هم ایلوسیز جفا ئوزوزه، هم جفا منه
ظلم اوسته شیعه وقتی توکور شیعه نین قانین
گویا خدنگ ظلمی وورور اقربا منه
وقتی که ئوز ائوینده منیم شیعم آج یاتور
باجا دگور کی یوز وئره حال بکا منه؟
ناهیّ منکر هاردادی، آمر به امر هانی؟
بی جا یئره سیز ایله میون التجا منه
تا چاره سیز بلا باشیوا گلدی سسلیسن؛
یارب سن اول بوعرصه ده مشکل گشا منه
وقتینده قادر الّلهیزین دامنین دوتون
وقتینده بیله سسله؛ کی رحم ائت خدا منه
وقتینده التجا ائله درگاه خالقه
وقتینده یوللا گوز یاشیوی توتیا منه
بیربیر حرملرین قاپوسی باغلانور ندن؟
بو منظره غریبه اولور غمفزا منه
بیت الرّضا و کعبۀ معصومیه باخون
آللهه یالوارون وئره شاید ندا منه
کربوبلایه حسرت اولوبسیز دیئنمیسیز؛
((من کربلایه عاشقیدیم کربلا منه))
آللهین ئوز ضریحینه ده ال وورانمیسوز
باغلاندی بیر مکان کی وئرردی صفا منه
مسجدلریزده نولدی نماز جماعته
بس هاردا قالدی ذکر دعا و صلا منه
وقتی حضور قلب نمازیزده یوخ سیزون
خالق دئمز کی ائتمه نمازی بپا منه؟
ئوز دردینه عزاده هامی آغلوری فقط
نه آغلوری حسینه، نه ایلور نوا منه
ظلم و فساد، خلقه یالان سوز دئماق، ربا
حتی دعای ندبه ده ایلور ریا منه
آخر گلوم هارا من اَیا شیعۀ علی
باخ گور مکاندی بیله زماندا هارا منه
بزم عزاده، هیئت و مسجدده یوخ صفا
حال آنکه؛ ذره عشقیز ائدر اکتفا منه
نفس زکیّه دوزدی ایاقدان دوشن زمان
من قالخارام قیامه، اَیَر باش منا منه
مینلر زکیّه نفسی ئولور بو زمان ولی
نه ایلوسوز بو امره، نه ده اعتنا منه
محراب و منبرین آزالوب ایندی حرمتی
هر کیمسه اوردا ایلیه بولمز دعا منه
عالِم فقط شعار وئرور پس عمل هانی؟
هر کیم دورور یئریندن ائدور ادّعا منه
آخر زمان یاخونلاشوری حاضر ایلیون
بیر جانماز و منبر و شال و عبا منه
ظلم اهلی کیمسه اولسا گرک سرنگون اولا
لازمدی قدّ و قامتی اولسون دوتا، منه
اسلام پرچمین وورارام بام کعبیه
وهّابی و یهود ائده تا اقتدا منه
شعرین «مُصَیـب» ائتسه کتابت خلوصیلن
عشق ایلرم اونون سوزونه من؛ اودا منه
- سه شنبه
- 4
- آذر
- 1399
- ساعت
- 13:3
- نوشته شده توسط
- یوسف اکبری
- شاعر:
-
محمد علی مصیبی
ارسال دیدگاه