بیر گونی سو آپاروردی ایوه بیر عورت زار
کوزه نی حمل ایده بولموردی او رنجور و فکار
الغرض بو الحسن اول کوچه دن ایلوردی گذار
دیزلری تیتره دی تا گوردی همان منظره نی
گوزی دولدی دئدی الله اوزون عفو ایله منی
قاباقا گیتدی آلوب کوزه نی بی قید و ریا
پیرزن باخدی بدون اینکه امامی تانیا
آغلیا آغلیا دیلدن آغیا ائتدی دعا
دئدی الله ایکی دنیا سنه احسان ایله سین
مرتضائیله و لیکن اوزی دیوان ایله سین
آغانین قلبی یانوب پیرزنون بو سوزونه
بیر بیره ویردی اَلین اشگی توکولدی یوزونه
زمزمه ایلدی گویا بو سوزی اوز اوزونه
دئدی سن کی دیوسن حاکم عادل سن علی
سنه نه گلدی بولاردان نیه غافلسن علی
الغرض گیتدی تدارک اولارا شام ائلدی
عورتین غصّه لی ایتامینه اطعام ائلدی
آتا تک آلدی سینیق قلبیلرین رام ائلدی
باش چکنده نچه یول گونده او بیت الحزنه
او ایوین اهلی دییردی آغامیز گَلدی گینه
نچه مدّت دولانوبدی بئله ایّام زمان
تا یتوشدی شب بیست و یک ماه رمضان
جمله بی کسلره اسرار نهان اولدی عیان
اوچ گیجه یدی چیخا بولموردی علی منزلدن
آز قالوردی دوشه ائوده او اوشاقلار دلدن
همان عورت که علیدن اونا لطف اولموشدی
بو گیجه لیک اونون بخت گلی سولموشدی
آج یاتیتموشدی اوشاقلاری گوزی دولموشدی
بیر شیرین دل بالاسی ناگه آیولدی یوخودان
آناسین سسله دی گویا بو دیلیلَن او زمان
آنا جان دور یوخی گلمور بو گیجه گوزلریمه
اورگیم چوخ داریخوب بیر قولاغ آس سوزلریمه
گوگلومی غصه دوتوبدی غم آلوبدی بو گیجه
بس یتیم لر آتاسی هاردا قالوبدی بو گیجه
او که رأفتله گلوب گوگلوم آلاردی کیمیدی
قاپینی هر گیجه آهسته چالاردی کیمیدی
نان و خرما بیزه احسان گتورردی کیمیدی
نه گلوب باشینه بس هاردادی اول کان کرم
گَلمسه نه یاتارام من نه غذا میل ائدرم
- سه شنبه
- 4
- آذر
- 1399
- ساعت
- 14:13
- نوشته شده توسط
- یوسف اکبری
ارسال دیدگاه