بادِ ظلم اسدی گینه طوفان ایدوب بحرِ ملال
اولدی یر دارُالمَلالِ عرشِ خدای ذوالجلال
آغلیون ای شیعه ایّامِ عزادور آغلیون
آغلاماخ چون توشهء روزِ جزادور آغلیون
آغلاسا یر گوگ بو ماتمده سزادور آغلیون
مصطفا ماتم دوتوب ، آغلار ولیّ لایزال
قدسیان یاسه باتوب عرشِ برین آغلار بو گون
انبیا ماتم دوتوب ، روحُ الامین آغلار بو گون
ای حسینی ایستییَن آغلا حسین آغلار بو گون
سن حسینی سن اگر سنده ندور بو اغتفال
اشکِ غمله مجتبانون گوزلری دولدی بو گون
غصّه دن رخسارِ شاهِ کربلا سولدی بو گون
فاطمه رحلت ایدوب زینب یتیم اولدی بو گون
وای آنام وای سویلیوب توکدی عذاره اشکِ آل
هانسی دلده واردی قدرت ایلسون شرح و بیان
فاطمه بو دارِ دنیاده نه لر گوردی عیان
شمّه ای عرض ایلسم اوضاعِ حالین شیعیان
حالِ ختمِ انبیایه یوز ویرور تغییرِ حال
اوندا که جرئت تاپوب دشمن مدینه شاهینه
باخمادی زهرای مظلومین فغان و آهینه
قلبینی یاندیردیلار اود ویردیلار درگاهینه
یاندی درگاهی ، او اود قلبینده چکدی اشتعال
بولمورم ثانی نه حاله سالدی اول بی یاوری
سسلدی فضّه چاغور گلسون ولیّ داوری
پوزدی بو سس غیرتُ الله آدلانان نام آوری
گور نولور حالی او مولانون اوزون بیر فکره سال
چیخدی صحنِ خانیه تا یخدی صبرین خانه سین
تاپدی سوز و سازیده شمعِ عزا پروانه سین
گوردی نه حالتده بولمم مصطفی ریحانه سین
سالدی فورا" اوز عباسین اوستونه افسرده حال
هر زمان کیم حضرتِ صادق دییَن سوز یاد اولور
غصّه دن آباد اولان گوگلوم ایوی بر باد اولور
حشر اولونجا تک او بیر سوز باعثِ فریاد اولور
آغلیوب یانسام یری وار صبح و شام و ماه و سال
ای ولیّ عصرِ حاضر ، آیتُ اللهِ صمد
جدّوه وی ثانی تاپوب اثنای رهده بی مدد
ایمدیده قلبِ رسولی یاندیرور جورِ لَگد
بو نه سوزدور گلدی تقریره اولیدیم کاش لال
عقل حیراندور خبرده شرح اولان مرقومه دن
بیحیا شرم ایتدی نه معصوم و نه معصومه دن
جیریله آخر قباله آلدی اول مظلومه دن
چالدی یرده ایتدی اول خطّ شریفی پایمال
بو ستملردن بتولین اولدی قلبی داغدار
گون به گون سولدی سارالدی چون گلِ فصلِ بهار
غصّه مرگ اولدی خانم ، عالِمدی حیّ کردگار
ایسته سن ائت صادقِ آلِ محمّددن سؤال
وقت او وقت اولدی بتول عقبایه رحلت ایلسون
محنتینده عالمی غرقِ مصیبت ایلسین
آه او ساعتدن که ایستردی وصیّت ایلسون
عرض ایدوب گَل گَل عم اوغلی یتدی وقتِ ارتحال
بیر بودور عرضیم منی اوندا که درک ایتدی اجل
دفن و کفنیمه گیجه مشغول اولوب ایله عمل
ایستیرم چون ویرماسون تابوتیمه بیگانه ال
روحیمه باری اذیّت ایتمسون قومِ ضلال
گلمسون دفنه اولار که قلبیمی یاندوردولار
اود ویروب درگاهیمی ظلمیله اودلاندوردیلار
حکمِ آیاتی دانوب ، احکامیدن یان دوردولار
ناطقِ قرآنین آخر بوینونا سالدیلا شال
بیرده مندن قالدی دنیاده نشانه زینبیم
تا اولا محنت کشِ دورِ زمانه زینبیم
ایمدیدن قوبما ولی گلسون فغانه زینبیم
من کیمی زلفی آغارسون قامتی اولسون هلال
کربلاده آغلاسا وار حقّی ، منده آغلارام
یاندیریب بو سوزِ آهیمله جهانی داغلارام
نورِ عینمدور حسین ، من گوزلرینی باغلارام
شمرِ بی پروا الیندن زینبیم تاپماز مجال
گر چه چوخ زحمت سنه ویردیم بو دوقّوز ایلده من
زحمتیم پایانه یتدی ای ولیّ ذولمنن
خواهشیم بیرده بودور سندن ایا شاهِ زمن
هر زماندا عورت آلسان بیر نجیبه عورت آل
بو یتیمه اولادیمه اولسون منیم تک مهربان
پرورش ویرسون نجه گلبرگی بسلر باغبان
چون پرستاری یتیمون خوشدی اولسون خوش زبان
تا یتیمون قالماسون قلبینده اندوه و ملال
هم آنالیق ایلسون اوغلوم حسینه من کیمی
هم حسنه مهربان اولسون منیم تک سن کیمی
وای او گوندن کیم اولار رنگی گلِ سوسن کیمی
دادگر یاندوخ ، بو دادی دادسیز اسمادن آل
بو حسینیم بیرده جدّیندن امانتدور منه
مایهء فخریمدی اسبابِ شفاعتدور منه
بیر قیامتدن اوتور هر گون قیامتدور منه
ماجرای کربلانی هر زمان قیلّام خیال
ایمدیدن یانّام حسینون حالتِ مذبوحینه
شمرِ بی پروا چیخاندا سینهء مجروحینه
روحیم اینجیر آند اولا ختمِ رسالت روحینه
طایرِ روحیم توکر باغِ جناندا پَرّ و بال
قوی دیوم من یاعلی آغلا نوایه سنده گَل
من گیدنده شوریله کرب و بلایه سنده گل
کوفه ده اوّل گجه مطبخ سرایه سنده گل
گور حسین اوغلوم اولان منزیلده واردور نه جلال
انبیالر باش آچار اوج ایلر عرشه ولوله
من یتن ساعت یارالی باشینی آلّام اله
سینم اوسته بسلین باشی گورم باتمیش کوله
حقلیَم اوندا آنالیق حقّینی قیلّام حلال
حسرتیله بیرده شیرِ داوره باخدی گوزی
بیر باخیشدا مرتضانی یاندیروب یاخدی گوزی
دل شهادت ذکرینه گویا اولوب آخدی گوزی
آقتابِ برجِ عصمت دفعتا" تاپدی زوال
چون کفن پوش اولدی جورِ روزگارون خسته سی
او
اولدیلار آگه بو حاله قلبینون دلبسته سی
باغِ جنتّده اولان زینت ایکی گلدسته سی
یعنی گُل رخسار حسن ، بیرده حسینِ مه جمال
بیر خدا بیرده علی بولدی نه حاله قالدیلار
اوزلرین بیردن آنا تابوتی اوسته سالدیلار
بیر سوزیله روحِ زهرانین قرارین آلدیلار
عرض ایدوبله ساقلیقون تک دور بیزی آغوشه آل
بو یانیلقی سوز ایله پوزدی او غم رنجیده سین
یاندیریب یاخدی بو دنیانین مصیبت دیده سین
آچدی قول ، آغوشه آلدی ایکی نورِ دیده سین
آغلادی گوگده ملایک ، یرده شاهِ بی مثال
سس یتیشدی یاعلی گیتدی ملکلردن قرار
قیل بو شیرین دللری تابوتِ زهرادن کنار
خوش دلیله دیندیریب هم ایتدی لطفِ بی شمار
تا آیردی نعشِ زهرادن او شاهِ خوش خصال
هاردا قالمیشدی او گون یارب همان شیرِ خدا
اوندا که اوغلی حسین ایتمیشدی جان عطشان فدا
ایلییدی تا ربابی قانلی نعشیندن جُدا
سینه سی اوسته که دوشموشدی او مرغِ بسته بال
نه یارالیدی بتولین پیکری نه عوریدی
نه سینیق خنجر شکسته تیغیله مستوریدی
نه یارالی نعشی اوسته اشقیا مأموریدی
نه کنارینده حیاسیز دشمنیدی نه رجال
اوچ یاشیندا بیر بالا یوخ دور و برده مهربان
تار و مار اولسون جهانی نسگل اولدی شیعیان
گلمدی شیرِ خدا ، امّا که گلدی ساربان
عمّه سی زینبده حتّی داده گلدی احتمال
تا اوجالدیب نحس الینده تازیانه ساربان
گتدی سکّانِ سماواتی فغانه ساربان
نیلدی بولمم او طفلِ خوش زبانه ساربان
شه بالاسین سینیه آلدی ، دئدی سینمه ده قال
گوردی ال چکمور جفاسیندن او قرآن دشمنی
سسلدی وورما آتام نعشین ایا شومِ دنی
قوی دوروب گللم آپارسان هر دیاره سن منی
باخمارام بوینمدا وار بیر قیدِ الفت تک حِبال(ریسمان)
اوز وجودیمده من ارزش بولمرم بیر ارزنه
(شأنی) آدین قویدولار امّا حسینیلر منه
سنده نومید ایتمه یا زهرا امیدیم وار سنه
اولما راضی اوغلوین مدّاحی اولسون پایمال
منبع:کانال مدح و مرثیه
- چهارشنبه
- 5
- آذر
- 1399
- ساعت
- 19:59
- نوشته شده توسط
- یوسف اکبری
- شاعر:
-
مرحوم حسین شانی تبریزی
ارسال دیدگاه