حالِ احتضارینده فاطمه گوز تیکوب یولا یااباالحسن
رنجه قیل قدم تا قدومیوه، جان ایدم فدا یااباالحسن
من حبیبهء حیّ داورم، بو جهاندا طاهایه یادگار
افتخاریدیم کلّ عالمه، تک سنیله ایلردیم افتخار
بسکه چوخ علاقه ویروب نشان، هانیه لقب تاپدیم اشتهار
سعی ایدردیم هر حالیده سنه گوسترم وفا یااباالحسن
واجب الطّاعه ایدوب سنی کلّ عالمه خالق العلا
بارها منابرده شأنیوی، خلقه ذکر ایدوب ختمُ الانبیا
ماسوایه مولا ایدوب سنی اول چکیدهء کلّ ماسوا
ائت حلال اگر ایلنمدیم حقّیوی ادا یااباالحسن
یوخدی یاعلی بیر نفر بولن جز خدا و طاها مقامیوی
تالیِ کلامِ خدا، بولر اهلِ علم شیوا کلامیوی
اولموشام مکدّر ایشتموشم اهلِ یثرب آلمور سلامیوی
پاس قویمیانلار حریموه ایلمز حیا یااباالحسن
یوخ غمیم که یوخدی قارداشیم، سنی ایتمرم عوض مین برادره
نه برادر ای جان برابری، یوخ نیاز بیر اوزگه یاوره
بو جهاندا گوز تیکموشم سنه، وار توکّلوم حیّ داوره
هر زماندا زهرایه نصرتون ایلر اکتفا یااباالحسن
وار منیم اول دُرّه شباهتیم، غفلتا" دوشوب دستِ جاهله
یا وورار داشا سندیرار اونی، یا هدر ویرر امرِ باطله
منجنیقِ غمده فلک منی، بس سالوب فشاره بوله بوله
ثابت ایلیور درّه دهرِ دون ویرمیوب بها یااباالحسن
تک نه منله دشمندی بو جهان، اوصیائیله اولیائیله
انبیا بلی باغریقان اولوب، مین غمیله مین ابتلائیله
چرخِ کجمدارون وار الفت و سازشی فقط اشقیائیله
تنگ و تار زنداندی مؤمنه، صحنهء سرا یااباالحسن
سن که مؤمنین امیری سن، چوخ اولار سنیله عداوتی
چرخِ کجروش ایلیوب بری، کانِ علمه جاهل رعیّتی
بابِ وحیه اود ویردیلار بولار، داندیلار کتابیله عترتی
گیتدیلر خلافِ وصیّتِ ختم الانبیا یااباالحسن
عُقده و عداوت اولوب سبب، بی وفا منافق جماعته
گلدیلر او گون چکماقا سنی، مسجدِ پیمبرده بیعته
دینیم امر ایدوب باغلیام کمر اهتمامیله حُسنِ خدمته
قویمیام که امّت امامیله ایلیه جفا یااباالحسن
بیله بیر مقدّس مرامیله پشتِ درده ایتدوم مقاومت
ساخلیام خطردن حریموی، ایلیم اویمدن مواظبت
حفظِ عِرضِ قدسِ ولایته، منده گوسترم بیر مشارکت
چوخ چالیشدیم، افسوس ایدنمدیم دفعِ ابتلا یااباالحسن
منبع:کانال مدح و مرثیه
- چهارشنبه
- 5
- آذر
- 1399
- ساعت
- 20:2
- نوشته شده توسط
- یوسف اکبری
ارسال دیدگاه