تاپوپ بلالی باشیم درد بی دوا یارالی
غریبه درده علی اولدی مبتلا یارالی
آخوری عارضیمه گوز یاشیم مصیبتدن
اولوبدی وِرد دیلیم وا مصیبتا یارالی
محالیدور قوریا گوزیاشیم فراقونده
قضا اِیدوب منه بو فعلی اقتضا یارالی
مدام آغلیورام ماتمونده صبح و مساء
بو غمده آغلیانا حَق ویرر جزا یارالی
دور ای چراغ فروزان محفل عصمت
مزارون اوسته گلیبدور غم آشنا یارالی
سسیمی آلسان اگر سس یتور منیم سسیمه
اویان که دردون اِیدوب قَدیمی دو تا یارالی
نه یاتموسان گوزون آچ ای عزیزه دو سرا
یِتیشموری سنه یا ناله و بکا یارالی؟
اِیشیتمیسن سَسیمی قبریوین کناریندن
شکسته نی تک علی ایلوری نوا یارالی
بویور گوروم ساحالوب سینه ده او کاری یارا
و یا که قان ویروری قبریده یارا یارالی
دیردیم اولمیا ای کاش بیر گونوم سنسیز
عجبدی تاپدی منیم عمرومی بقا یارالی
نه لازمیدی منه سنسیز عمر طولانی
فنا اولیدی گورم عالم فنا یارالی
خطور خاطر اولور حُسن نیتون دائم
او پاک نیتیوه من اوزوم فدا یارالی
اورکده درد و غمون اِیتمدون منه اظهار
کِچن گیجه دل شب اولدی برملا یارالی
ویرنده غسلوی الله بولور نه چکدیم من
موثر اولدی دله ظلم اشقیا یارالی
سالاندا آی ایشیقین مغسل اوسته عارضیوه
نَلر گوروبدی گوزوم بیر بولور خدا یارالی
سینان قابورقاوا باخدوقجا اود دوتوب قلبیم
سزا دگولدی سنه بیر بیله جفا یارالی
نه یاخشی سرّی قیزیم زینبه قالوب پنهان
ئولردی اِیلمسیدون گر اختفا یارالی
ئولوم ایاقینه گیتدی کیچن گیجه غمدن
زبس که سَس سسینه ویردی مجتبا یارالی
گوتوردی معجریوی باسدی باغرینا گلثوم
ددی یوزوم گوله عالمده مطلقا یارالی
حسینیدن خبر آلسان سورشما احوالین
اولوب ایشیقلی گونی غصّه دن قرا یارالی
بیر آیری عالمیدی بو کچن گیجه محفل
بالالارون هامیسی اولدی هم صدا، یارالی
جهان جهان اولالی گورمیوب بیله ماتم
دوباره گورمیجاق بیر بیله عزا یارالی
اگر چه شام غریبانه اولمادی گلنیم
آچوبدی باشینی معناده مصطفی یارالی
جهاندا چوخلی توجه (عتیقه) ایلمیشم
توجهاتیمه اِیلوبدی اتکا یارالی
جزاده سیزده توجه بو نوکره اِیلیون
نه چون که عمریده اِیلوبدی چوخ خطا یارالی
منبع:کانال مدح و مرثیه
- چهارشنبه
- 5
- آذر
- 1399
- ساعت
- 20:17
- نوشته شده توسط
- یوسف اکبری
- شاعر:
-
استاد داود طهمورثی
ارسال دیدگاه