صفای گلشن دین، نزهت بهشت ولا
بهای گوهر عصمت، چکیده تقوی
یگانه خاطره زنده نفس مولادن
هامی مراتب فضل و کمالده یکتا
حیا خزینه مخفی، او کنزه بو، گوهر
عفاف مشعل روشن او مشعله بو، ضیا
بسیط خاکده محدود، شاهد قدسی
نجه که ضیق عبارتده وسعت معنا
حیا تجسمی، عصمت مثالی، دین شرحی
وفا ثبوتی، صفا شکلی، صبر و سلمه رضا
بهشت جلوه و حورا سرشت، اما نه
بتول و فاطمه، بس نه بهشت نه حورا
رکوعنه متذلل، عناصر علوی
سجودینه متواضع صوامع علیا
نفس حصاره دوشور سینه ملائکده
ایدنده زمزمه لاشریک له، زهرا
حریم سایه سینه دورباش عصمتدن
نفوذ اولموب ایده نور مشعل بیضا
او مه یوزون عظمت هاله سی، ایله بورویوب
که یوخ تصور معنایه فکرده یارا
بو آرزوئیله سرگشته دور نسیم جنان
که خاک کویون ایده، کحل دیده حورا
دوتاندا اوز گویه وجهت نغمه سی دلده
دئیب خلوصنه سکان عرش آمنا
گل بهشت وئریب باش کویر غبراده
مگر که آرتیرا بو شوره زاره ذوق و صفا
سموم حادثه اسدی ولیک گلشننه
قرار و طاقتنی دلدن ایلدی یغما
بهار ابری کیمی دولدی حق گورن گوزلر
شقایق اوسته نثار ایتدی لوءلوء لالا
بهاری اولدی خزان رحلت پیمبردن
ایشقلی گوندوزونی ایتدی غم، شب یلدا
آتا فراقی گتیردی اونی ایله درده
که مونسی گیجه گوندوز اولوب فغان و نوا
ایله سیزلدادی دلدن آتا فراقنده
که گلدی ناله و فریاده صخره صما
آتاسی چکدیقی زحمتلری خیاله سالیب
اولوردی صبح و مسا، ورد و ذکری وا ابتا
اوجالدی شیون و فریادی شهر یثربدن
بتول ناله سی شور قیامت ایتدی بپا
عدو جفاسی، نبی فرقتی، علی محنی
گتیردی نی کیمی فریاده قلب فاطمه نی
- چهارشنبه
- 5
- آذر
- 1399
- ساعت
- 20:27
- نوشته شده توسط
- یوسف اکبری
- شاعر:
-
حاج حسین عابد
ارسال دیدگاه