دوشمـوشم بحر بلايه اورگيم توفاني
منه زندان ايليوب خصم دني دنياني
در و ديـوار آرا سيندا گزورم جاناني
يارالي سینه يوزوم نيلي اوزوم نيمه نفس
اودلانوب درگهه وحي اولدي ايويم همچوقفس
چكدي امواج بلا ورطه ی طوفانه منی
سالدي غم بندينه بير فاسق ديوانه مني
ياندروب نـار شرارتده چو پـروانه منی
بیر ایله حاله سالاندا منی اُول شوم دغل
گلمدي يـانيمه الله نيـه مـامور اجل
يتش امداديمه فیضه كه پريشان ئولورم
يارالي خسته نفس ديده سي گريان ئولورم
در و ديـوار آراسينـدا اورگـي قان ئولورم
گل اوزون سسلمه امّا او شـه والاني
گورمسین قان آپارور یاره لنن زهراني
اود وروبلار قاپـيا نارین ايچينده يانورام
قول قابورقام سینوب اشرارون ايچينده يانورام
آيري عـالمديم افكارون ايچينده يانورام
گيدورم من سيز عم اوغلوم بیلورم درده دوشر
غصب اولوب حقی اونوندا ید نامرده دوشر
گور نه طغيان ايليوب دهريده ثاني شرور
سيم و زر عشقي اونون گوزلريني ايلدي كور
ملتون دونمگی بیزدن اونی ایلوبدی جسور
بی وفالر داغیلوب قالدی عم اوغلومدا وحید
ائتدی ثانی ستمی محسنی بطنیمده شهید
اورگیم یاره سینه یوخدی بو دنیاده دوا
گيـدورم دار فنـادن یارالی دیلده نوا
آچماميش غنچه مي ورديم ره قرآنه فدا
بالامون اولمگي قلبيمدن آلوب طاقت و تاب
گيـدورم ختم رسولون يـانينـا ديده پرآب
- پنج شنبه
- 20
- آذر
- 1399
- ساعت
- 0:8
- نوشته شده توسط
- یوسف اکبری
- شاعر:
-
کربلایی حسن آخوندی
ارسال دیدگاه