قیزون بلالره سنسیز دچار اولوب باباجان
ایشیق گونوز گوزینه لیل تار اولوب باباجان
گیجه گونوز دیرم عمرومی قوتار یارب
وفاتیمی یاخون ائت بیر شعار اولوب باباجان
بو آزماندا که آیریلمشام وصالوندن
زمانه چوخ بیزه ناسازگار اولوب باباجان
گونوزلره بو مصائب اگر توکلییدی
باخان گورردی که بیر شام تار اولوب باباجان
او قدر غصه لره دوزموشم ، باشیم آغاروب
بو عمر فاطمیه ناگوار اولوب باباجان
یتوب بهاریمزه آفت خزان سنسیز
گوزوم فراقیوه گوهر نثار اولوب باباجان
حسینیله حسنون گل یوزی سولوب سارالوب
شکسته دل او ایکی گلعذار اولوب باباجان
سولوبدی گلشنوین گل لری صفاسی گیدوب
چمن جفائیله پامال خار اولوب باباجان
اولار که دوره وی آلموشدیلار گوزوندن ایراق
بو گون کنار علیدن کنار اولوب باباجان
قالوب اباذر و سلمان بیرده بیر مقداد
زمانه تک هامی بی اعتبار اولوب باباجان
غدیر خمده تبریک ایدن منافقلر
مخالفت یولونا رهسپار اولوب باباجان
او گون که غسلیوه مشغولیدی علی ایوده
مدینه ده بو خبر انتشار اولوب باباجان
ایدوب سقیفه ده شورا مهاجر و انصار
نهان غرضلر او گون آشکار اولوب باباجان
گرک امیر اولا بیزدن دیردی هر ایکیسی
او یرده کشمکش و گیر و دار اولوب باباجان
او کس خلافته تعیین اولوب بو امتدن
که هجرتونده سنه یار غار اولوب باباجان
ولی هوای ریاست دوتوب گوزین افسوس
مراد مرکبینه تا سوار اولوب باباجان
بو قصدیله فدکی آلدی ، بیز فشاره دوشاق
خیال باطلیله کامکار اولوب باباجان
عم اوغلوموندا گیدوب حقی یوخدی بیر کمکی
اسیر قید گدا ، شهریار اولوب باباجان
ابی قحافه نون اوغلون ایدوبله خلقه امیر
علی جواندی بو بیر اعتذار اولوب باباجان
او عذرلرله عم اوغلوم اولوبدی خانه نشین
گور امتون نجه بی بند و بار اولوب باباجان
بیر اهل دل تاپا بولمور علی دئسون دردین
غریب و بیکس دار و دیار اولوب باباجان
گونوزلر ایوده گجه ، نخل زار یثربده
بو تیره شب لری شب زنده دار اولوب باباجان
گیدر قویولارا دل عقده سین ایدر خالی
علی او حده اسیر فشار اولوب باباجان
گلر تک ایوده قوجاقلار ایکی دیزین اوتورار
انیس و همنفسی ذوالفقار اولوب باباجان
یواش یواش دانیشار تیغ خونفشانیله
دییر بو تیغیله دین پایدار اولوب باباجان
و لیک امر پیمبردی منده صبر ایلرم
اطاعتونده عجب بردبار اولوب باباجان
دییر که حقیمی آلسام ، گیدر حقیقت دین
اونا دوام شریعت حصار اولوب باباجان
او تاجدار جهان داره ظلم امتدن
فراخنای جهان تنگ دار اولوب باباجان
نه تک خلافت اولوب منحرف مسیریندن
ولایت اهلی هامی سوگوار اولوب باباجان
اگر قالیدی او الده که تاپشوروب گتدون
باخان گورردی جهان لاله زار اولوب باباجان
ولی هزار تاسف دوصد هزار افسوس
عزیزلر بو مصیبتده خوار اولوب باباجان
قاپوم یانوب دئمورم اود دوتوب یانار اورگیم
شرار آه دلیم شعله بار اولوب باباجان
تهاجم اولدی ، دفاع ایلدیم عم اوغلومدان
او خدمتیم منه عز و وقار اولوب باباجان
کمال قدرتیله دشمنی دایاندیردیم
گوروبله فاطمه سد شرار اولوب باباجان
امان او لحظه که مجبور اولوب یخلدیم من
علی او حادثه دن شرمسار اولوب باباجان
حرامسرای حریم ولی لم یزله
هجوم فرقه بی ننگ و عار اولوب باباجان
شهید ایدوبله منیم اوز ایویمده محسنیمی
شهادتی منه بیر افتخار اولوب باباجان
بیر اوزگه شاهده یوخ احتیاجی ، تک سینم
نشان ویرور که ندن زخمدار اولوب باباجان
اوزین بو درگهه وابسته ایلیوب(خوندل)
بیزیم شفاعته امیدوار اولوب باباجان
بولر امید اوزینه اهل بیت و قرآنی
کتاب و عترته خدمتگذار اولوب باباجان
منبع:کانال مدح و مرثیه
- چهارشنبه
- 5
- آذر
- 1399
- ساعت
- 20:41
- نوشته شده توسط
- یوسف اکبری
- شاعر:
-
حاج حیدر خوندل
ارسال دیدگاه