سن سیز بابا توکندی تاب و توانیم ای وای
هجرونده جانه دویدوم بیچاره جانیم ای وای
قویدون بو امت ایچره اوز عترتین امانت
دور گور نجه امانت ساخلار وفاسیز امت
هتک اولدی احترامیم، حددن گیچوب اهانت
گیتدی سنیله وقریم، اعزاز و شانیم ای وای
گر امر ایدیدون امت، زهرایه ایتسون آزار
هرگز بو قدری ظلمی بولمزدیلر سزاوار
عکس وصیتونجه بو امت ایتدی رفتار
عاجزدی شرح حاله نطق و بیانیم ای وای
قوم اولدی لاابالی، سن ارتحال ایدندن
گویا بو بی وفالر، بیزاریمشله سندن
ایمدی قصاص ایدیله بیداد الیله مندن
یوخ مامن و پناهیم تا دالدالانیم ای وای
چوخ ببر یاخون زماندا دور زمانه دوندی
سولدی بهار عمروم، فصل خزانه دوندی
زلفوم آغاردی غمدن، قدیم کمانه دوندی
غم غصه دن قوجالدیم، عمر جوانیم ای وای
امت عم اوغلوم حقین، انکار ایدوب داناندا
چوخ مشکل اولدی امریم، درگاهیم اودلاناندا
اوز آهیمله منده یاندیم قاپوم یاناندا
اوج ایتدی طاق عرشه آه و فغانیم ای وای
قالدیم قاپو دالندا دوشدوم بیر اوزگه حاله
واضح بیانه گلمیر، باعثدی چون ملاله
بولمم ندندی یتمز عمروم گونی زواله
اوچماز سنق قفسدن مرغ روانیم ای وای
قالدیم غریب لر تک، کنج وطنده بیکس
هر قدر امانه گلم، یتمز سسیمه بیر سس
اوف بیله روزگاره هاردا قالوب اجل بس
سالدی منی نفسدن درد نهانیم ای وای
ایش یتدی بیر مقامه ظلمون نهایه سینده
حفظ اولمادی شئونیم، بیتیم وقایه سینده
آخرده دالداندیم بیر نخله سایه سینده
گویا که بیر غریبم یوخ خانمانیم ای وای
داده یتن تاپلمور تا دردیمی دیوم من
کسدی همین آغاجی بو قوم، نیلیوم من
بس هاردا باش آچوب تا بیر شیون ایلیوم من
گونلر ایونده قالدوم یوخ سایه بانیم ای وای
قومون گلور ستوهه من نالیه گلنده
قویموللا سس چکوب بیر بابا دییم وطنده
تا وار جان آغلارام بو بیت الحزنده منده
اولسون گرک اولونجه چوللر مکانیم ای وای
ویرم قسم الهی من عصمت رسوله
(ذهنی) ایدن دعانی لطفیله قوی قبوله
عفو ائت منی، یتور بیر جان و دلیم بتوله
یوخ وصلینه ئولومدن اوزگه گمانیم ای وای
منبع:کانال مدح و مرثیه
- چهارشنبه
- 5
- آذر
- 1399
- ساعت
- 20:48
- نوشته شده توسط
- یوسف اکبری
- شاعر:
-
استاد مرحوم ذهنی
ارسال دیدگاه