ای جماعت گل باغ نبوی ، فاطمه یم
مادر زینب کبری ، علوی فاطمه یم
من او زهرایم آدیم گویده ملک لر تاجیدی
یاری یانمش قاپمون جن و ملک محتاجیدی
همسریم عدله گوره کینه داشین آماجیدی
کرسی دشمنی آهیله پوزان ، فاطمه یم
مرتضی آدینی تاریخه یازان ، فاطمه یم
من او زهرایم آتام عالمه سروردی منیم
همسریم نابغه ی خلقت داوردی منیم
شآنیمون شاهدی قرآنداکی کوثردی منیم
لب رحمت الینه بوسه ووران ، فاطمه یم
آتاسی ام ابیها چاقیران ، فاطمه یم
من او زهرایم آنام مفخر نسوان عرب
حسنیم سید و سالار جوانان عرب
همسریم شیر خدا فارس شجعان عرب
آتامین شآنینی گویلرده ملک دن سوروشون
همّتوز واردی چیخون چرخ و فلک دن سوروشون
من او زهرایم آدیم زینت قرآندی منیم
حسنیم ، زینت مردان مسلمان دی منیم
باشیمون تاجی حسین شاه شهیداندی منیم
آلتی آیلیق بالاسی عرشه گیدن ، فاطمه یم
کوینگون طوی گونی انفاق ایلین ، فاطمه یم
من او زهرایم آدیم کبر و ریادن بَریدی
قامتیم دینه گوره هر خطره مشتریدی
یاری یانمش قاپوم ، حق جبهه سینون سنگریدی
میخ سینه سینی غمله بولن ، فاطمه یم
محسنی ضربه ی ثانیله ئولن ، فاطمه یم
من او زهرایم آتامین غمی آغلاتدی منی
آنام ئولدی آنامون طایفه سی آتدی منی
فلکون اولمادی رحمی چوخ اوجوز ساتدی منی
غم ایامه همیشه بورونن ، فاطمه یم
مرتضانون دالیسیجا سورونن ، فاطمه یم
بیر گونی ثانی منیم کوچه ده کسدی یولومی
کوچه باریکیدی دوتدی صاقیمی هم صولومی
حسنین بوینونا سالدیم ایکی لرزان قولومی
دیدیم ای نابخرد ،ر دورما یولوم اوسته منیم
وحشتیندن اسوری گور نجه مظلوم حسنیم
دیدی یا فاطمه آلدون فدکون مدرکینی
دیدیم آتدون نیه بس ختم نبی مسلکینی
دیدی ویر امضالیوم بند لرون تک تکینی
دیدیم ای ظالم اوتان نیتیوه باخبرم
گیت دایانما یولوم اوسته ، سنی نفرین ایدرم
دیدی یا فاطمه من باید آلام بو سندی
مهر ایدم بندلرون بو سند مستندی
دیدیم آخر سوزیوی ظالم اوتانما منه دی
دیدی یا ویر سندی یا سنی قانه بویارام
ویرمه سون جبریله آلّام گوزون آغلار قویارام
دیدیم ای خصم دنی بسدی اوتاندیرما منی
یورقونام یاره لیم یولدا دایاندیرما منی
قوی گیدیم منزلیمه گیجدی یوباندیرما منی
یولومی گوزلیه نیم وار منیم ای خصم زمان
منه رحم ایلموسن باری پیمبردن اوتان
قهرناک اولدی منیم دوزمه دی بو سوزلریمه
باخمادی حجب و حیادن ۷ آخان اشک تریمه
ووردی بیر سیلی دولوب قان قورویان گوزلریمه
الی سنگینیدی دگدیم نچه یول دیواره
قولاقیمدان قیریلوب دوشدی یره گوشواره
نانجیبون الی سنگینیدی یاندیردی منی
یارالاندی قولاقیم قانه بویاندیردی منی
حشره جک معدن تقوادن اوتاندیردی منی
آتامون قلبون او بی شرم و دنی یاره لدی
فدکین مدرکینی شدّ تیلن پاره لدی
- چهارشنبه
- 29
- اردیبهشت
- 1400
- ساعت
- 22:25
- نوشته شده توسط
- یوسف اکبری
- شاعر:
-
مرتضی اسکندری
ارسال دیدگاه