یتیردی کامه فلک اشقیانی آی زهرا
قیزیل قانا بویادی مرتضانی آی زهرا
بیر اللی خیبری فتح ایلین علی ایندی
گوزونی آچماقا یوخدی توانی آی زهرا
خیال ایلمه بیر ضربتیله محرابه
یخیلدی بدر و اُحد قهرمانی آی زهرا
علینی آیریلیقون ئولدورور و اِلّا من
تحمل ایلیرم هر یارانی آی زهرا
خدا بیلور که جوان ئولمگون قوجالتدی منی
رشید قدّیمی ائتدی کمانی آی زهرا
ئورگیمه باخان اولسا گورر که شان شاندی
یانوب اوجالمیوب اما فغانی آی زهرا
سنه دئمیشدیم ئولونجه غمونده آغلیارام
گور ایندی منده بو صدق بیانی آی زهرا
ئولن چاقیمدادا حتی سنه عزادارم
اَلور بو گوزلریم اشک روانی آی زهرا
ئولوم قطاری سالوبدی یولون بیزیم قاپیدان
دوتوب صدای جرس آسمانی آی زهرا
جهاندا هر قاپیدا اگلشر اجل دوه سی
یوبانماز آخرتین کاروانی آی زهرا
مسافرت ائلین طفل تک علی سئویونور
وجودیمی بوریوب شادمانی آی زهرا
عوض ائدوب ائویمی آیری منزله چیخورام
منی یوروبدی بو دنیای فانی آی زهرا
نیه سئوینمیوم آخر قوناقلیقا گلورم
بیر ائو که سنسن اونون میزبانی آی زهرا
فقط بیر علته خاطر بئله پریشانم
دوتوبدی غم بو دل ناگرانی آی زهرا
گئجه خرابه لره باش چکوب اولاردیم من
هامی غریبلرین هم زبانی آی زهرا
یقین یتیم لرین گوزلری قالوب یولدا
یوخ ائوده چوخلارینون آب و نانی آی زهرا
نئدیم کئچن گجه دن یادینه سالان یوخدی
بیر عده غمکش و بی خانمانی آی زهرا
اجل گلنده کیمون سینه سی آغیرلاشسا
فشاره دوشسه چیخان وقته جانی آی زهرا
دیلله وار ئورگینده اونون جوان داغی
ساغالمیوب هله زخم نهانی آی زهرا
اجل گلوب ائله جان اوسته منده جان به سرم
علینون الده ئولوبدی جوانی آی زهرا
اگرچه زاده ی ملجم دی ظاهراً قاتل
آپاردی لعن زمین و زمانی آی زهرا
ولی اولار اوتوز ایل باطناً ئولوبدی علی
گئدوبدی تپراقا روح روانی آی زهرا
ابوتراب اوتوز ایل دی ئولوبدی یثربده
دؤننده قتلگهه آستانی آی زهرا
او گونکه یاندی قاپی توستی دولدی وحی ائوینه
بلشدی دوده علی دودمانی آی زهرا
شریعت اللریمی باغلادی دوروب باخدیم
سنی یانان قاپیدا ویردی سنی آی زهرا
بالام ئولوب ئوز ائویمده دویولدی ناموسیم
بو غصه لر اَریدر استخوانی آی زهرا
کفن بیچن گجه زهراسینه ئولوبدی علی
کتاب عمری اولوب بایگانی آی زهرا
یارالی پیکروه غسل ائدنده مغسلده
یخیلدی غزوه لرین پهلوانی آی زهرا
سو دیجگین آغیز آچدی یارون قابورقاندا
دایانمادی یاروون تازه قانی آی زهرا
خطرلی عرصه ده جنگ ایلینلرین حتی
بیر اِیله یاریه گلمز گمانی آی زهرا
نه یاخشی کوینگون اگنونده قالمیشیدی هله
چتین اولاردی او دردین عیانی آی زهرا
یارالی سینوی زینب او حالدا گورسیدی
ئولردی گورمزیدی کربلانی آی زهرا
بفوری ال آپاروب کوینگونله گیزلتدیم
او زخم رو سِیَه و خون فشانی آی زهرا
نه حالدا غسل و کفن ائتدیم الله عالمدی
چکنمیوردوم او بار گرانی آی زهرا
گئجیله خلعتوون باغلیاندا باش بندین
قیریلدی طاقتیمون ریسمانی آی زهرا
نه قید و بند کفن روحیمی دوگون ویردیم
غم ائتدی جسمیمه زندان جهانی آی زهرا
مدینه ده غربا مثلی غملی تربتوون
نه اولدی بیر آدی نه سایه بانی آی زهرا
همان گجه سنی تپراقدا گیزلدنده دئدیم
غریب قبرینون اولماز نشانی آی زهرا
غرض عم اوغلوی دنیاده بی کمک قویدون
حیات تاپدون ئوزون جاودانی آی زهرا
- جمعه
- 7
- آذر
- 1399
- ساعت
- 20:7
- نوشته شده توسط
- یوسف اکبری
ارسال دیدگاه