خط سیرینده گونون آیدور دوشن ایل آی دالینجا
کربلا دشتینده گون دوشموشدی اما آی دالینجا
گلدی گوردی آی فلکدن سیرینی سالموش کناره
سیر اعلادن اوتور یرده اولوبدور پاره پاره
باش ویروب هر یاره دن چشمک وورور سانسیز ستاره
یاره لر گلمز شماره هر نه سایسان سای دالینجا
سسلدی ای فلک رفعت کیم سنی گرداب ایچنده
لنگرین سالدی قویوب طوفاندا پیچ و تاب ایچنده
حیدر ثانیدی گویا غرق خون محراب ایچنده
نه روادور سسلیم سیندی بیلیم ایوای دالینجا
پرچمین تا اوج رفعتده واریدی اهتزازی
عالمه معلومیدی روشن حسینین امتیازی
زینبین سنسیز قارالدی آسمان اعتزازی
اصغره قویمازلا بیرده اوخشانا لایلای دالینجا
ئولدورر لشکر حسینی عائلم بیکس قالالار
رعد فرمانیله برق افتاده اخیامی تالالار
صوندا چون تیر شهاب اللرده قمچیله سالالار
هر قاچان یورقون قزین آت شیهه سیله های دالنجا
بارش ظلمین دالی قوس و قزح باشلار خرامه
قتلگهدن قوزانار سالار افق اقطار شامه
هفت رنگ جوریله بیداد ایدر آل کرامه
بیرده گورمز روزگار دون او ظلمه تای دالینجا
ای مواسی عبد صالح خدمتی اسلامه عالی
ارشد تیپ مجاهد وادی عشقین غزالی
کیمدی سن تک نهریدن سو ایچمه موش دوشسون آرالی
گونده آخرده باتار قارداش بو دمده آی دالینجا
یاتما بو وحشت فزا چولده وفالی قارداشیم دور
باغ عمریمده گلیم غنچَم صفالی قارداشیم دور
واردی حقّیم ایندی من یانسام یارالی قارداشیم دور
لالیه بستر گوروب کیم ارغوان بیر لای دالینجا
یاغدی طوفان زا تگرگ بو یرده یاتدی شیر بیشه
اولدی هنگامه چمن داغون اولوبدور برگ و ریشه
تابش نور اولدی گزلین کاخ بلبل گوردی تیشه
تیز بهاره گلدی پائیز و زمستان یای دالینجا
دره ظلمی جباله ملحق ایتدی اهل کینه
جوی خون اوستندن آخدیردی رضای مشرکینه
وای اولا قارداش قرین درد و غم ام البنینه
بُلمور ایندی ناله دن کلثوم اولوب چون نای دالینجا
((شاکره)) یاخشی آچیلدی عاقبت باب سلامت
یوز ویروب توفیق خدمت بوندان آرتوق نه سعادت
سوزلری دلدن یتورسه هر دقیقه هانسی ساعت
خوان احسان حسینیدن گیدر هر پای دالینجا
- دوشنبه
- 10
- آذر
- 1399
- ساعت
- 22:20
- نوشته شده توسط
- یوسف اکبری
- شاعر:
-
احمد شاکری
ارسال دیدگاه