ای منتظر انصاف ائله مهدی نیه گلسون
بیز غرق فسادوخ هله مهدی هارا گلسون
بیجا ائلمه موعضه ای بی عمل عالم
اول ئوزون اصلاح ائله تا دین قالا سالم
یامهدی دئیوب حقینی خلقین یئمه ظالم
چوخ لنگیدی بو قافله مهدی هارا گَلسون
مجلس لریمیز اکثری کانون ریادی
منزلریمیز، وا اَسَفا فتنه سرادی
گوز مهدیه بیگانه دی سوز مهدی بیادی
ای طالب بی حوصله مهدی هارا گلسون
من تک چوخی الدن وئروب عقلین سوزی قانمور
آد شیعه، روش حیله دی مهدی دن اوتانمور
مین رنگه دوشور، بیرهدف اوستونده دایانمور
گوزلور هله مهدی گله مهدی هارا گلسون
ایام محرمده گئیور اون گونی قاره
اگنینده قرا طعنه ورور تعزیه داره
سوزدور دئدیم العاقل و یَکفیه الاشاره
بو شیعه دی؟ یا حرمله؟ مهدی هارا گلسون
احیا گجه سینده باشیوا قرآن آلورسان
فرصت گونی خلقین داماریندان قان آلورسان
مهدی گلجاق قان آلا سن کی جان آلورسان
هی لعن ائله اسرائیله مهدی هارا گلسون
مسجده نمازه دایانور اول صفده
یوز قبله ده من تک اورگی آیری طرفده
اللهه دئیور ساخلا منی راه هدفده
شیطانلا ائدور معامله مهدی هارا گلسون
بو ملت هاچان بس بیلجاخ خیر و صلاحین
رزمنده هله هئچ یومیوب قانلی سلاحین
باخسون بو جوانلار سوزونه هانسی جناحین
دوستلار داغلیبلار چوله مهدی هارا گلسون
زیبنده دئگول یاریله یارین سوزی چیخسون
بیگانه نی طرد ایله بو صفدن ئوزی چیخسون
هر کیم شهدا قانین ایاقلور گوزی چیخسون
گر حقی ساتاخ باطله مهدی هارا گلسون
- سه شنبه
- 11
- آذر
- 1399
- ساعت
- 22:54
- نوشته شده توسط
- یوسف اکبری
- شاعر:
-
ولی الله کلامی زنجانی
ارسال دیدگاه