حَقّه کیم باغلاسا دل غصه‌ی دوران ایلَمَز
بش گونون لذّتینه غفلت و عصیان ایلَمز
شأن انسانلیقا اَل تاپسا اگر عقلِ بَشر
ئوز مرادیندن ئوتور خلقی پریشان ایلَمز
تابع مکتب اسلام وقاریله یاشار
بوشلیوب خالقنی خدمت خاقان ایلمز
نَفسینه حاکم اولار جوهری پاکیزه اولان
عبد اَهریمن اولوب دعوی ایمان ایلَمز
هانی شَدّاد بَنا ایلَدیگی باغ اِرَم
چرخ دون هانسی عمارتدی که ویران ایلَمز
قویما پیراهنوی لَکّه لیه شَهوَت نَفس
سیم و زر عشقی سنی یوسف کنعان ایلمز
اولماسا ران مَلَخ قدری اگر تُحفه‌ی مور
کاخ اجلاله سلیمان اونی مهمان ایلَمز
حفظ شأن ایله دیانتله ئوز انسانلیقوا
دست تقدیر یقین دیوی سلیمان ایلمز
سنگ قبر اوسته اگر شام و سَحَر شمع یانا
خانه‌ی قبرووی هیهات چراغان ایلمز
- چهارشنبه
- 12
- آذر
- 1399
- ساعت
- 22:33
- نوشته شده توسط
- یوسف اکبری
- شاعر:
-
سید تقی سیفی اردبیلی
ارسال دیدگاه