گول تک نه تیز اولدون خزان آی ننه
دونیدی گردش زمان آی ننه
یانام آنا بیر بلبلم چمنسیز
آناسیز قیز بیرگون اولماز محن سیز
دنیانی نیلورم بو ائوده سنسیز
وصلت گلوم اولدی خزان آی ننه
دونیدی گردش زمان آی ننه
باشلادی ایمدیدن باشیم بلاسی
گولمز یوزی ، ئولسه قیزین آناسی
سن که گئتدون گئتدی ایوین صفاسی
ایو اولدی پوزقون گلستان آی ننه
دونیدی گردش زمان آی ننه
بو ایوده سایه باشیمه سالاردون
محنت گونومده قیدیمه قالاردون
غمگین اولاندا گوگلومی آلاردون
اولار یوخیدیلرگمان آی ننه
دونیدی گردش زمان آی ننه
اهل دل اولسا دلده چوخ سوزوم وار
عالم آنا اولسا سنده گوزوم وار
هر قدر غم یتسه منده دوزوم وار
هجرانیوه یوخدور توان آی ننه
دونیدی گردش زمان آی ننه
هرکیمسه نون قبیله سی یادی وار
تک دورآنا قبیله نون آدی وار
آنانون عالمده ئوزگه دادی وار
آناسیز قیزگولر هاچان آی ننه
دونیدی گردش زمان آی ننه
دیمم گلوب بو حالیمه یانیدون
محال دردیمی آسان سانیدون
الله بولورکه سن نجه آنیدون
یادیمدان چیخماسان بیرآن آی ننه
دونیدی گردش زمان آی ننه
دیمم " بالالارون " قرا بختیدور
دیمم رختیم یتیمه لیق رختیدور
هر چند عالمده ئولوم سختیدور
آیریلیق الندن امان آی ننه
دونیدی گردش زمان آی ننه
ایلر منی افسرده دل ملالون
بولّم اله دوشمز داخی وصالون
گل یوخوما هر دم گوروم جمالون
هجره دوزمرم اینان آی ننه
دونیدی گردش زمان آی ننه
گللر سولارگورسه رخ زردیمی
باتار غمه گورن آه سردیمی
سندن صورا کیمه دیوم دردیمی
کیم ایلر دردیمه درمان آی ننه
دونیدی گردش زمان آی ننه
سن که گیتدون سیندی بو قول بوداقیم
کوی وصله چاتماز بیرده ایاقیم
بیرگیجه گل یوخومدا اول قوناقیم
گل تک نه تیز اولدون خزان آی ننه
دونیدی گردش زمان آی ننه
- شنبه
- 15
- آذر
- 1399
- ساعت
- 22:59
- نوشته شده توسط
- یوسف اکبری
ارسال دیدگاه