زهرا گوزون آچ حیدرون احوالی یاماندی
غم پرده لیوب گوزلریمی گوز دولی قاندی
گوز یاش یرینه قان النور چهره مه زهرا
سس ویر سسیمه یاتما عم اوغلون نگراندی
دورت گول آلوب اطرفیمی نالان و پریشان
آغلار بولارون ایشلری آهیله و فغاندی
زینب باش آچوب سسلنور ایوای ننم ایوای
کلثوم پریشان یوزه گوز یاشی رواندی
زهرا ایویمون شمعی سنیدون گیجه وقتی
سونمه دور ایاقه حسنین جانی آماندی
باخ گور نجه آغلور سنی مندن حسین ایستور
گویا بابا سویلور آنامیون حالی یاماندی
ای حیدرون آمال و امیدی، سنه قربان
باخ گلشنیمه حالتی چون فصل خزاندی
سنسیز نجه حیدر دینن عمر ایله سون آخر
قان عشقیویله بو شریانیمده رواندی
قالدون درودیوار آرا ای غملی نگاریم
سینون هدف میخ در اولدی یارالاندی
قلبیم دایانور فاطمه مسماره باخاندا
مسمارین اوجی قانیویله قرمزی قاندی
ای سیده ی کل اوناث ایکی عالم
جانیم سنه قربان غمون الساعه عیاندی
گوردوم سینه یارون ، یوزیوه سیلی دگوبدی
بیلدیم نه گلوب باشیوه قلبیم پارالاندی
درگاهی یانان یاریوی دیندیرسنه قربان
جان فاطمه قدرون کیمی قبرونده نهاندی
اون سکیز ایل عمرایله دون ای غملی نگاریم
آز عمریوه «ثاقب »گوزونون یاشی رواندی
- شنبه
- 11
- اردیبهشت
- 1400
- ساعت
- 21:9
- نوشته شده توسط
- یوسف اکبری
- شاعر:
-
کربلایی فخرالدین اسکندری
ارسال دیدگاه