دُنیاده دورت مخدره گویا چوخ آغلیوب
قاره گیوب عزالی قالوب سینه داغلیوب
بیر اکبرین آناسیدی لیلای دلکباب
بیر فاطمه نشانه سی،بیر بینوا رباب
اما اوئی که عادتی داد و اَنینیدی
عباس آناسی فاطمه امّ بنینیدی
گرچه بیر عمر اوغول غمینه سینه داغلیوب
دشمن عقیده سیله دیوللر آز آغلیوب
بیر گون بِلیکه کثرت غمدن او بینوا
بیر گوشهٔ بقیعده ایلردی آه و وا
گلدی نوایه بسکه نواسین کم ایتمدی
مروان گچوردی قلبی یانوب دوردی گیتمدی
گوندردی تئز غلامی کیمون گور عزاسیدور
عرض ایلدی امیر،ابولفضل آناسیدور
قلبی یانوب او شوم و شقی گلدی رقته
ام البنین آدین ایشدوب دوشدی حیرته
بیردن دیدی غلام درست آشکار ایله
عباس آناسی ساغدی مگر ئولمیوب هله
گل دورمیاخ بو سمتیده قوی ایتسون آه و زار
مین ایل بو غمده آغلاسا البته حقی وار
در واقع آغلیاندا او خاتون دلکباب
ایلردی چشم عالمی بیر آهیلن پر آب
اولموشدی مونس آه دل جانگدازیلن
عباسینون یتیمینی ساخلاردی نازیلن
غملر سخاندا خسته دل داغدارینی
آغوشینه چکردی اوغول یادگارینی
هر گون بیر ایوده ناله و شیون ایدردیلر
دعوت اولاندا هر یره باهم گیدردیلر
هر گون بیر ایوده حاضر اولوب دختر بتول
باشه یغاردی عترت زهرانی دل ملول
بیر گون چاغوردی فضه نی علیا مخدره
امّ البنین ایوینده حضورین خبر ویره
فرمایش ایتدی فضه دوتوب قلبیمی ملال
امّ البنین آناما گیدوب ایله عرض حال
ویرسه اجازه بیزده گلوب سس سسه قوشاق
عباس ایوینده بیز باش آچاق باهم آغلاشاق
فوراً باش اگدی فضهٔ غمدیده دلفکار
امّ البنین منزلینه اولدی رهسپار
قاصد دایاندی مقصد اولان آستانه ده
گوردی غریبه منظره وار صحن خانه ده
بلمم ننوعی فضه نی پوزدی او منظره
نه گیتدی نه قیتدی جلوس ایلدی یره
بیر قدر باخدی آغلادی حسرتله دویمادی
تا ایستدی سوزین دیه گوزیاشی قویمادی
بیر سوز دینمدی گنه دوردی دوشوب یولا
گلدی حضور زینبه زلفین یولا یولا
زینب سوروشدی فضه ندن ایلسون نوا
آیا دیدون جواب بَلی گلدی یا که لا
عرض ایتدی یوخ،دینمدیم ای منبع کرم
مندن سوروشما گوردیگمی من دینمرم
عرض ایتمرم نه گورمشم ای باغ غمده گُل
بو قدری وار که گیتمگمیز مصلحت دگُل
بیر حالتیله گورمشم ام البنینی من
گلمور دیلیم او گوردوگیمی ایلیم علن
گیتمه خانم یانار دل زارون فغاننه
گیتسون آپارما خرداجا قزلاری یاننه
تاب ایلمز اورکلری چون قانیلن دولار
قزلار او حالی گورسه یقین غصّه مرگ اولار
زینب بویوردی فضه دئ اصل قضیه نی
مرمؤز سوزلرون نگران ایلدی منی
عباسین اولما اوغلی غم و ابتلا گوروب
یا بیر نفر اونا آتا مرگین خبر ویروب
رؤیاده یا گوروب او بالا غم اساسینی
بیدار اولوب رقیه تک ایستور باباسینی
یاندیرما قلبمی منی آز باغریقان ایله
تئز گوردیگون قضیه نی روشن بیان ایله
فضه گوروب اگر دیمسه عین مطلبی
بو غصه برهم ایلیه جک حال زینبی
مجبور اولوب او گوردیگی اسراریدن دیه
ام البنینون ایتدیگی رفتاریدن دیه
عرض ایلدی خانم ایدرم ماجرانی فاش
بو شرطیلن که ایتمیه سن سینوی خراش
گیتدیم دیم سفارشون افسرده حالیلن
گوردوم او داغدیده نی من بو ملالیلن
الده یتیمنون الی دلده اوغول غمی
ویرمش اونون قوجاقنه بیر قانلی پرچمی
آزدور قوای جسمی توکور گوزدن اشگینی
زحمتله گزدیرور آتانون قانلی مشگینی
همتله بار قافله‌ی غم دولاندیرور
چگننده مشگی،سینه ده پرچم دولاندیرور
هر کیم گورور او منظره نی رقّت اَل ویرور
امّ البنین اونا باخور عباسینی گورور
بیر آز گیدور ملال و محن قلبنی سخور
لنگر ایدور او طفلی عَلَم تپراقا یخور
امّ البنین قاچوب چکور آغوشه مثل جان
اوندان دیور وفالی ابوالفضلیم هارداسان
عنقای پرشکسته هایاندا سخلموسان
قولسوز ننوعی سن اوجا یردن یخلموسان
قبرون دیولله خوردادی یانّام ملالوه
فکر ایلورم سبب ندور آیا او حالوه
گویا او قدری که بیچیلوب قامتون سنون
چوخ دوغرانوب یقین کیچیلوب قامتون سنون
- یکشنبه
- 16
- آذر
- 1399
- ساعت
- 18:36
- نوشته شده توسط
- یوسف اکبری
- شاعر:
-
مرحوم رحیم منزوی اردبیلی
ارسال دیدگاه