هارداسان ای جانيمه جان علی جان علی جان
ای باجوا روح و روان علی جان علی جان
یولاروا گول سپرم گلنده گلنده
گول دوداقوندان اوپرم گلنده گلنده
جان سنه قربان ائدرم گلنده گلنده
گل ئولورم قارداش امان علی جان علی جان
ديل يارالی غصه ليم پريشان پريشان
غملر ايچينده يا نورام نواخوان نواخوان
عاشقم عشقونده اولوب اورگ قان اورگ قان
گوزدن اورگ قانی روان علی جان علی جان
بير باجيام سنده علی گوزوم وار گوزوم وار
سيلی دگوب نیلی اولان يوزوم وار يوزوم وار
گلسون اگر دیلده سنه سوزوم وار سوزوم وار
قلبيمی یاندیردی سنان علی جان علی جان
گل باجوی قارداشيم آل قوجاقه قوجاقه
گول دوداقون قُوی بو یانان دوداقه دوداقه
ديل گوزی مائلدی بئله قوناقه قوناقه
هجرون ايدوب باغريمی قان علی جان علی جان
هجريده گوندوز گوزومه تار اولوب تار اولوب
رنج و محن گلدی منه يار اولوب يار اولوب
داغ فراقون منيچون نار اولوب نار اولوب
عشقيده ياندی دل و جان علی جان علی جان
سالدی منی خصم دنی عذابه عذابه
شاميده اولموش وطنيم خرابه خرابه
باش قويارام من گجه لر ترابه ترابه
تپراق ئوزی اولدی مکان علی جان علی جان
يازدی آخوندی بو سوزی نوالی نوالی
گوز ياشی یوزده اورگی يارالی يارالی
ديل يارالی باشدا قرا عزالی عزالی
سويليور هر يرده عيان علی جان علی جان
- سه شنبه
- 18
- آذر
- 1399
- ساعت
- 23:40
- نوشته شده توسط
- یوسف اکبری
- شاعر:
-
کربلایی حسن آخوندی
ارسال دیدگاه