سلام اولسون سیزه قانه باتانلار
مجازی عشقینی با شدان آتانلار
بر سوزانیده عطشان یاتانلار
دورون گلدی گنه دیداره زینب
گونی بختی لباسی قاره زینب
حسین سن سن منیم روح و روانیم
ایاقدان دوشموشم یورقوندی جانیم
بلالی زینبم یوخدور توانیم
ایدوب هجران اوخی قلبیمی یاره
سالوب غملر منی غملی حصاره
حسین سندن كه جبریلن ال اوزدوم
فراقونده ئوزه گوز یاشی دوزدوم
دایاندوم محنت عظمایه دوزدوم
وفالی ائت نظر اهل وفایه
گتوردوم غم قطارین كربلایه
مزارونده یاتوبسان جانیمه جان
یانوندا وار ایكی اوغلون اورگ قان
سن عطشان اكبر عطشان اصغرعطشان
پوزولموش حالوه عالملر آغلار
رباب و لیلی غمدن سینه داغلار
سنون تك بیر نفر مظلوم ئولن یوخ
ورولدی قلبوه اوچ شعبه بیر اوخ
جداده باشوه داش وردیلار چوخ
اولار داش وردیلار باخدوقجا یاندیم
بواعظم ظلمه صبر ایتدیم دایاندیم
اجازه ویر دیوم درد و بلادن
بلالی یولدا كی جور و جفادن
او خصم بی حیا شمر دغا دن
یوخیدون قمچی لردن جانه گلدیم
گجه گوندوز حسین افغانه گلدیم
چكیلدوك مجلس اغیاره گیتدوك
عزالی باغلی قول پیكاره گیتدوك
یزیدی یخماقا درباره گیتدوك
جلوس ائتمیشدی تخت اوسته او ظالم
سكوت اولموشدی دربارینده حا كم
باشون گوردوم اودم طشت طلاده
الینده خیزران اُول هنده زاده
دوداقوندان وراندا مست باده
گلوبدور عترتون نی تك نوایه
چاغوردوم منده زهرانی هرایه
دوروب قصرایچره من گفتاره چیخدیم
یزیدی یخماقا اشعاره چیخدیم
او پست شومیلن پیكاره چیخدیم
دانیشدیم حق سوزی مقصوده یتدیم
ستم كاشانه سین ویرانه ایتدیم
منه ئوز ویردی امّا عُمده بیر غم
بو غم اولدی منه بیر داغ اعظم
گتوردوم عترتون قارداش بیرین كم
رقیون عمری چون یتدی تمامه
سفیر ایتدیم اونی من شهر شامه
شماتتدن بالام افغانه گلدی
غمیندن نالیه بیگانه گلدی
آجیندان یوخ جفادن جانه گلدی
سسین ویرانه دن قصره یتوردی
یزید فاسقی جانه گتوردی
او قصر ایچره یزید پست و نادان
دیدی بو سس منی ایلوب پریشان
گجه وقتی گلور هاردان بو افغان
گورون كیمدور نه ایستور تز ویرون سیز
یانقلی آهی وار خاموش ائدون سیز
گجه بیردن ایشقلاندی خرابه
باشون گلدی قوناق اول دلكبابه
بالون باخدی منه بیرده ربابه
دیدیم گلدی قیزیم دردون دواسی
یواش آغوشه آل چوخدور یاراسی
گلوب با شه طرف اُول ماهپاره
گوروبدور لبلرونده واردی یاره
توكوب گوزیاشینی غمدن عذاره
دوداقین قویدی اول قانلی دوداقه
ایدوب جانین فدا سن تک قوناقه
آخوندی من کیمین گوزلر دولی قان
اولوب هجرونده محزون و نوا خوان
دیور هر بیر نفس مولا حسین جان
عنایت ایت اونا دار فناده
قالوب حسرت گوزی کرب و بلاده
- پنج شنبه
- 20
- آذر
- 1399
- ساعت
- 0:11
- نوشته شده توسط
- یوسف اکبری
- شاعر:
-
کربلایی حسن آخوندی
ارسال دیدگاه