دور قبردن ای بلالی قارداش
باشدان داغلان جلالی قارداش
سن کرب و بلالی سن ولیکن
منده باشی ماجرالی قارداش
آچ گوزلرون ای عزیز جانیم
دیندیر منی باشیوه دولانیم
عشقونده دوشوب بلایه باشیم
ایلوبدی منی عزالی قارداش
اولموشدی منه بو گون سعادت
گلدیم سنی ایلیم زیارت
پیشوازه دور ای شه ولایت
دیدار ایله اهل عیالی قارداش
هر قدر دیسم خبر واریمدی
هر شام واریمدی هر سحر واریمدی
عرضیم بودی مختصر واریمدی
ایلوم سنه شرح و حالی قارداش
من چوخ یولی پا پیاده گیتدیم
گیتدیم ولی فوق العاده گیتدیم
هم مجلس ابن زیاده گیتدیم
گوردوم او شقی رجالی قارداش
من آتش ظلمه یاندیم اوندا
اول شهری گیدوب دولاندیم اوندا
چوخ گلدی تانیش اوتاندیم اوندا
سانکه یوخوموش حیالی قارداش
بیر عده باخیب منه گولوردی
بیر عده ده حالیمی بولوردی
بیر عده الینده داش واریدی
بیر عده ده غصه دن الوردی
شاماتیده بیر حکایتیم وار
اوردان سنه چوخ شکایتیم وار
چوخ ظلمه هله رعایتیم وار
شرح ایلمورم وفالی قارداش
ویرانه نی منزل ایلدیم من
هر ثانیه می ائل ایلدیم من
آسان ایشی مشکل ایلدیم من
توکدوم یوزه اشک آلی قارداش
تاپشیرمیشدون منه امانت
منده اونی ایلدیم ضمانت
اوندان ولی اولموشام خجالت
الدوردولر اول عزالی قارداش
اولموشدی منه رقیه یولداش
تک قالدیم او یولداش اولدی قارداش
منده اونیلن الیدیم ای کاش
قویمیدی منی عزالی قارداش
الدی منی قویدی یانه یانه
سانکه گلیدی گیدوب خزانه
تاپشیردیم "امینی" نوحه خوانه
آختارسین او نونهالی قارداش
- یکشنبه
- 24
- مرداد
- 1400
- ساعت
- 10:41
- نوشته شده توسط
- یوسف اکبری
ارسال دیدگاه