اوتوز ئیل حق سوزی دایم دئمیشم بی پرده
دئمیشم حقی خدا قورخمامیشام هیچ یئرده
سر بلندم که باشیم ایندی سرافکنده دگول
مرد اولوب دهرده باش اگمه میشم نامرده
چاپلوسیله ریاکاره من انسان دئمدیم
بس که ثابت قدمم فلسفه حیدرده
پاچه خوار و ایکی یوزلی بشرین دشمنی ام
کیم منافقدی سئنار محکمه داورده
هر سازا اوینویان انسان بونی بیلسون دایم
اوینادارلار اونی قولچاق مَثَلی اللرده
چوخ وئریلسه بیرینه ارزش اگر حدیندن
ئوزونی شاه بیلر ئوزگه لری چون برده
کیم غروریله ئوزون عالمه برتر بیلسه
دوشه جک دیلدن اگر ازبر اولا دیللرده
ئوز یئرین بیلمیین البته که سرسَم دانیشار
اوتانوب بلکه خجالت چکه جک آخرده
سئرچه کی فکر ائلیور بلبل اولوب ، اصلینده
اوتوروب غرق حماقت شجر بی برده
خاک پایم اونا که صدقیله رزمنده اولار
یاغسا پیکان گئنه داغ تک داینار سنگرده
من حسین بن علی شاعری ام عشق اولسون
سوزومون جوهری تنها گورونر گوهرده
منی نادان تانیان ! علموه ناز ایلمه چوخ
عملون اولماسا بیر ذره ده دگمز درده
شرفیم واردی شرف بی شرفه ساتمامیشام
اولمیوب کج ایاقیم ذره خدا ناکرده
نه ریاست طلبم من نه مقام آختارودام
بسدی مولا آدیمی ثبت ائله سه دفترده
نچه گون حب ریاستله ئوزون مست ائلیین
یاتاجاق ذلتیلن نفسی آچان بسترده
خوش اونون حالینه که قلبلره حاکمدی
ئولسه ده خاطره سی حکم ائده جک دللرده
پایگاه حفظ و نشر آثار عباسی معروفان اهری
- یکشنبه
- 23
- آذر
- 1399
- ساعت
- 15:13
- نوشته شده توسط
- یوسف اکبری
- شاعر:
-
ابوالفضل عباسی معروفان
ارسال دیدگاه