منیم ننم مهربان ننم
ئولدی باغریقان ئولدی
سالوب فلک اختیاریدن
ویردی خسته جان ئولدی
ننم منه مهربانیدی خاطریم چوخ ایستردی
محبتلن دیندیروب منی سینه سینده بسلردی
ووراردی هی زلفیمه شانه چوخلی حرمت ایلردی
بش ئیل آغوشینده زینبون گویلونی آلان ئولدی
گجه اولور غم گلور منه آسماندا آغلور آی
دوشنده یاده سئنان قولی سسلرم ننم ایوای
اولوب دیلیم ازبری منیم نازیمی چکن لایلای
گجه گونوز دورت بالاسینون فکرینه قالان ئولدی
گرک قوشام اوخشاما ننم صحبتین دییم الله
آنام کیمین روزگاریدن من گیلیلییَم الله
اماندی رحم ائت آناسیزام بیر یتیمه ام الله
جهاندا بش سنیده قیزون تک قویان ننم ئولدی
ایدم بیان درد و محنتین گوزیاشیم امان وئرمز
او قدری غصه چکوب دئسم غملری سانا گلمز
بودور خیالیم که حشره جک قلب زاری دینجلمز
بوکوب بئلون غصه لر ننم قامتی کمان ئولدی
بنا اولوب کج مداریده کج بناسی دنیانون
غریبه دور گردشینده یوخ آشناسی دنیانون
ئولوم حقدور هر گلن گئدر یوخ وفاسی دنیانون
جفای دهره دوزن ننم حیف اولا جوان ئولدی
پایگاه حفظ و نشر آثار عباسی معروفان اهری
- یکشنبه
- 23
- آذر
- 1399
- ساعت
- 15:42
- نوشته شده توسط
- یوسف اکبری
- شاعر:
-
ابوالفضل عباسی معروفان
ارسال دیدگاه