زاده ی ملجم ووروب بیر باشه ضربت کوفه ده
سیندی ارکان شرف ئولدی شرافت کوفه ده
جبرئیل ائتدی ندا قُتل الامیرالمؤمنین
یعنی باتدی قانینه شاه ولایت کوفه ده
مسجد و محراب و منبر ئوز دیلینده سسلدی
ئولدی شاه لافَتی ئولدی عدالت کوفه ده
ضربت شمشیرلن قوزاندی بو سس گویلره
سمع آفاقه یتشدی بو عبارت کوفه ده
رستگار اولدوم خدای کعبیه اولسون قسم
عدلین اوسته قالمادی باشیم سلامت کوفه ده
(قتل علی لشدّت عدالته=علی از شدّت عدالتش کشته شد)
حق دانیشدیم حقّه خاطر حقّی احیا ایلدیم
یاردی خنجر باشیمی ائتدی عداوت کوفه ده
صورتیم قاندور محاسن قانلی دور سجاده قان
قانیلن دولدی بوتون محراب طاعت کوفه ده
بارالها شاهد اول مظلومی مظلوم ایتدیلر
قانلی باشیم سجده ده ائتدیم شکایت کوفه ده
ابن ملجم آیه ی منشقّی تفسیر ایلدی
گوستروب تفسیر ده چوخ چوخ
مهارت کوفه ده
قوزانوردوم سجده دن سسلندی محکم یا علی
گویدن اندیردی قلنجین وار نه قدرت کوفه ده
جنگ خندق ده دگن ضربت یرین ضربتله دی
ائتدی منشق باشیمی اول پست فطرت کوفه ده
عَمردن چوخ کینه سین بیلدیردی بو ظالم منه
بو عملده گورسدوب دلدن قساوت کوفه ده
روبرودن جنگده وورمشدی عمرِ عبدود
ووردی دالدان خنجرین بو نامروّت کوفه ده
تیغی زهرآلودیمش باشدان ووروب اولماز دوا
وار یقینیم قسمتیم اولدی شهادت کوفه ده
زینبه هجران پیامین من ننوعی بیلدوروم
طاقتین طاق ائتمسون تیر مصیبت کوفه ده
قورخورام نار فراقه قلب زاری دوزمسون
ائتمسون هجران غمینده استقامت کوفه ده
زینبه بو محنت عظماده وئر صبر ای خدا
یوخ آناسی ایلسون اوندان صیانت کوفه ده
وار یری عرض ایلیم قالمشدون هاردا یا علی
زینبین قدّین اگن وقته اسارت کوفه ده
کربلادن باشدا قاره گلدی بو شهره خانم
اولمادی بیر کس اونا ائتسون محبت کوفه ده
گزدیروبلر شهرده قولباغلی زهرانین قیزین
کوفه نین عورتلری ایلوب شماتت کوفه ده
نه اولوب عباسون اوردا نه حسینون نه حسن
زینبه ائتسون حمایت تا او ساعت کوفه ده
غرفه لردن باشینه کول توکدی کول باش کوفی لر
هتک حرمت قیلدیلار ارذل جماعت کوفه ده
«زعفرا» بو غمده توک رخساروه گوزیاشیوی
نشر ائله نه ظلم ائدوب اهل ضلالت کوفه ده
فُزتُ ربُّ الکعبه نی یاز کربلا تفسیر ائدوب
آشکار ایلوب اولا هر نه جنابت کوفه ده
کوفیان تاریخده لا یوفیه مشهور اولوب
بیعت ائتسه هر کسه ایلوب خیانت کوفه ده
- جمعه
- 28
- آذر
- 1399
- ساعت
- 21:11
- نوشته شده توسط
- یوسف اکبری
- شاعر:
-
زعفر آزادمهر شیخ درآبادی
ارسال دیدگاه