میدانه علی اکبری زینب یولا سالدی
آئینه ی پیغمبری زینب یولا سالدی
دلبند حسن قارداشینین روح و روانی
قاسم کیمی مه پیکری زینب یولا سالدی
عبداللهی گوندردی خانم گوزیاشی توکدی
هم عون و همی جعفری زینب یولا سالدی
بیر جوت گوزل اوغلین ائلدی دینینه قربان
گوز یومدی ایکی گوهری زینب یولا سالدی
نوبت یتیشوب صاحب پرچمدن ال اوزسون
عباس وفا پروری زینب یولا سالدی
بیر باخدی اوزین قولارینا گوزلری دولدی
چوخ آغلادی سرلشگری زینب یولا سالدی
میدانه حسین صود امر اوغلین آپاراندا
شش ماهه علی اصغری زینب یولا سالدی
وقت اولدی فلک کام آلا زینب قالا یالقوز
لشگر گوره لر رهبری زینب یولا سالدی
بیر باخدی او دریا قوشونا بیرده حسینه
گوزیاشلی او غم پروری زینب یولا سالدی
زهرا توخیان کوینگی وئردی او بلا کش
اوپدی او سوسوز حنجری زینب یولا سالدی
ناچار قالوبدور باجی قارداشدان ال اوزدی
اول سرور بی لشگری زینب یولا سالدی
گر چاره دئدی اولسا حسین گئتمه جداله
قیزلار دئمسون سروری زینب یولا سالدی
تا سن واریدون من بو قدر محنته دوزدوم
سایونده سنون ائللری زینب یولا سالدی
بیز روز الست عهد ایلدیک دین اولا پیروز
عهد اوسته هامی یاوری زینب یولا سالدی
ظاهرده شکست اولدی عیان لشگریمیزده
بیر بیر هامی همسنگری زینب یولا سالدی
یالقوزسان حسین دوره لیوب دوره وی دشمن
دوزمم دیه لر دلبری زینب یولا سالدی
سندن سورا یوخدور بیزه یاور آتام اوغلی
عباسیمیدی آخری زینب یولا سالدی
اوتلاندی حسین زینبین آخرکی سوزیندن
بیر باخدی فرات اوسته آخوب اشکی گوزیندن
بیر قدری گئدوب فکره او سلطان لب عطشان
ئولسم ده دئدی قوتما بیزوک فاتح میدان
نعشیم منیم آت دیرناقینین آتدا داغیلسا
محکم لشی دنیا بویی شیرازه ی قرآن
اولما نگران اکبریلن قاسم ئولوبدی
یا جعفریلن عونیم اولوب قانینه غلطان
عباسین اوزون قولاری ظاهرده کسیلدی
باطنده او قوللاردی سیزه یولدا نگهبان
مکتوب الستی اوخی قیل متنینه دقت
معناده اولوب رمزیله تاکید بو عنوان
حق اوسته منیم قانیمی ناحق توکه جکلر
عطشان کسه جک حنجریمی خنجر بران
تزویر سلاحین گوتورر آل امیه
تبلیغ ائلیر تا که باتا یتمش ایکی قان
من جام اجل نوش ائلسم نوبه سنوندی
تیز نطق سلاحین گوتی قیل حقیمی اعلان
ناحق توکولن قانلاری سعی ایله دیریت سن
همت کمرین باغلاگیلان اولما پریشان
من واقفم آیندیه بو عصرده ناظر
پیروز بیزوک غائله دن اولما هراسان
بیر پایه ی فتح و ظفرون صبردی زینب
بیر پایه سی ده نطق دی چون شعله ی سوزان
مندن صورا وئر لشکریوه صبر سلاحین
شاماته کیمی رنج سفر تا اولا آسان
اوچ منصبه دارا ائلیوبدور سنی خالق
هیچ کیمسه ده اولموب اوچی بیر یرلی نمایان
حلم حسنی نطق علی عصمت زهرا
تک سنده هویدادی بو اوچ رتبه ی شایان
قویما چکه لر حقه باجی پرده ی تزویر
مین مکریله طغیان ائلیوب زاده ی سفیان
شاماته کیمی صبر علمین آل اله اسدیر
جور و ستمین ریشه سینی نطق ائله کسدیر
بو سوزلری گر "زعفر" ائده دفتره تحریر
دنیاده اونین مشکلین آچ اولمیا دلگیر
- جمعه
- 28
- آذر
- 1399
- ساعت
- 22:22
- نوشته شده توسط
- یوسف اکبری
- شاعر:
-
زعفر آزادمهر شیخ درآبادی
ارسال دیدگاه