اصغرین حلقین ئوپوب اوچ شعبه پیکان آغلادی
سوزدی قان نازک بوغازدان باخدی سلطان آغلادی
دوتدی قانی اوجینا مظلوم دشت نینوا
گویلره سپدی گوگ اهلی گورجگین قان آغلادی
همهمه قوزاندی قوم بد شعار شامیدن
تلیدن زینب دئدی جان اصغریم جان؛ آغلادی
غیرتیندن تیتردی قان ایچره سقای حرم
علقم اوستونده یاتان قولسوز نگهبان آغلادی
خیردا حنجردن بویوک تیری چکن وقته حسین
الده عمامه گلوبدی شاه مردان آغلادی
جبرئیل اندی یره طاها گلوب زهرا گلوب
هود و نوح و صالح و خضر و سلیمان آغلادی
قدسیان کرّوبیان لاهوتیان ناسوتیان
اهل رضوان و ملائک ؛حور و غلمان آغلادی
ابر و باد و ماه و خورشید و فلک یاسه باتوب
کائنات آغلاشدی گویا عرش رحمان آغلادی
بیر گولوردی حرمله بیرده علی اصغر فقط
بو ایکی گولمکده چشم کون و امکان آغلادی
حرمله خوشحالیدی فکر ایلیوردی کام آلوب
بیلمدی ظلمینده حتی نامسلمان آغلادی
اصغرین بیلمم ندی اسرار لبخندی اوخا
گولدی اصغر حالینه اوچ شعبه پیکان آغلادی
عشق طومارین یازاندا«زعفرا»اوچ شعبه اوخ
لوح تقدیر و قضا و حکم دیوان آغلادی
- جمعه
- 28
- آذر
- 1399
- ساعت
- 22:23
- نوشته شده توسط
- یوسف اکبری
- شاعر:
-
زعفر آزادمهر شیخ درآبادی
ارسال دیدگاه