گرک حسینچی اولان صاحب دیانت اولا
نتیجه ی عملی دینینه ضمانت اولا
همیشه اگنینه تقوا لباسی زینت اولا
حسین کیمی سوزی هیهات مناذلت اولا
بویوردی حضرت صادق رئیس مذهب و دین
حسینه آغلیانین اجری دور بهشت برین
او گوزیاشی که دیوب شرطی واردی ایله یقین
بهشته گئدمگه لازمدی که طهارت اولا
بو نکتیه گرگ ائتسون حسینچی چوخ دقت
او هانسی گوزیاشی دور که بهاسی دور جنت
نه علته وئریلوبدی اونا بیله قیمت
بو قیمته داخی چاتماز نقدری نعمت اولا
او گوزیاشی که آچار باغ جنتین قاپوسین
تاپا گرکدی بو دنیاده عترتین قاپوسین
او خاندان آچالار تا شفاعتین قاپوسین
او گوزیاشی اونا تا که کلید جنت اولا
اولده شمر اوزی آغلوب حسینه واردی سند
گوروم که قادر قدرت عذابین ائتسون اشد
اونین او گوزیاشی گر بیر یره ییغیلسا چو سد
او آغلاماقلارا جنت محال قسمت اولا
حسینه آغلاسا هر کس حرام ایشه باخماز
حلالی ترک ائدنین اشکی صدقیلن آخماز
دوز عاشق عشقینه رنگ خیانتی یاخماز
محال دور بئله بیر عشقده صداقت اولا
حسینچی دلده حسین قلبده یزید اولماز
اولار خطاسی ولی جرمی چوخ شدید اولماز
ایچوب شرابی یقین مست اولوب پلید اولماز
بو کج مسیره گئدن تیره بخته لعنت اولا
ندندی ایندی حرامی هوسلین چوخدی
عزا لباسی گیوب شمری سسلین چوخدی
یزید عشقینی گوزیاشلی بسلین چوخدی
مگر روادی حسین عشقینه خیانت اولا
واریدی شمرده قالوبلاده زینب ده
واریدی شمرده کرب وبلاده زینب ده
توکردی گوزیاشی شمر دغاده زینب ده
مهم اودور او بکاده نه نوعی نیت اولا
بو آستانه ده "زعفر "خطا یولین گئتمه
مواظب اول عمل زشت و ناروا ائتمه
مرادیوه ره مکر و ریائیلن یتمه
تلاش ائله عملون مایه ی سعادت اولا
- جمعه
- 28
- آذر
- 1399
- ساعت
- 22:35
- نوشته شده توسط
- یوسف اکبری
- شاعر:
-
زعفر آزادمهر شیخ درآبادی
ارسال دیدگاه